વલસાડ સ્પેશિયલ ઓપરેશન ગ્રૂપ (SOG) ની ટીમે નેશનલ હાઇવે નંબર 48 પર તલવાડા ઓવરબ્રિજ નજીકથી એક વેગનઆર ટેક્સી કારમાંથી 9.961 કિલોગ્રામ ગાંજાનો જથ્થો ઝડપી પાડ્યો છે. પોલીસે સ્થળ પરથી ડ્રાઇવર સહિત 5 આરોપીઓની ધરપકડ કરી કુલ ₹5.83 લાખથી વધુનો મુદ્દામાલ જપ્ત કર્યો છે. પ્રાથમિક તપાસમાં આ નશીલા પદાર્થનો જથ્થો ઓડિશાથી મંગાવી સેલવાસ પહોંચાડવાનો હોવાનું ખુલ્યું છે.
બાતમીના આધારે વોચ ગોઠવી ટેક્સી કાર આંતરી
ભિલાડ પોલીસ સ્ટેશન વિસ્તારમાં પેટ્રોલિંગ કરી રહેલી SOG ની ટીમને ચોક્કસ બાતમી મળી હતી કે મુંબઈ તરફથી આવી રહેલી એક ટેક્સી કારમાં માદક પદાર્થની હેરાફેરી થઈ રહી છે. બાતમીના આધારે પોલીસે તલવાડા ઓવરબ્રિજ પાસે સઘન વાહન ચેકિંગ હાથ ધર્યું હતું. તે દરમિયાન શંકાસ્પદ વેગનઆર કાર (MH 02 GS 5338) ને અટકાવીને તલાશી લેતાં કારની સીટ નીચે તેમજ મુસાફરોના પગ પાસે સેલોટેપથી વીંટાળેલી વિવિધ બ્રાન્ડેડ બેગો મળી આવી હતી.
FSL તપાસમાં ગાંજો હોવાની પુષ્ટિ, ₹4.98 લાખનો જથ્થો જપ્ત
શંકાસ્પદ સામગ્રી મળતાં જ પોલીસે તાત્કાલિક સ્થળ પર FSL અધિકારીને બોલાવી પ્રાથમિક પરીક્ષણ કરાવ્યું હતું, જેમાં આ જથ્થો ગાંજો હોવાનું સાબિત થયું હતું. ડિજિટલ કાંટા પર વજન કરતાં કુલ 9.961 કિલોગ્રામ ગાંજો મળી આવ્યો હતો, જેની બજાર કિંમત ₹4,98,050 આંકવામાં આવી છે. પોલીસે ગાંજા ઉપરાંત ₹85,000 ની કિંમતના 5 સ્માર્ટફોન અને પેકિંગ સામગ્રી સહિત કુલ ₹5,83,050 નો મુદ્દામાલ કબજે લીધો છે.
ઓડિશાથી સેલવાસ ડિલિવરીનું નેટવર્ક, 2 વોન્ટેડ
આ કેસમાં પકડાયેલા આરોપીઓની ઓળખ શૈલેન્દ્રકુમાર ઉર્ફે પિન્ટુ યાદવ, મોહમ્મદ મોબિન ઉર્ફે રેહાન મલીક, રાહુલસિંહ, ખુશ્નુર આલમ શાહ અને સંદીપકુમાર ગૌતમ તરીકે થઈ છે. પૂછપરછમાં સામે આવ્યું કે આ જથ્થો ઓડિશાના ભુવનેશ્વર સ્થિત સાહુભાઈ મેડિકલ પાસેથી મેળવાયો હતો અને સેલવાસના સુરજકુમાર બિંદના કહેવાથી લાવીને રાજકુમાર નામના શખ્સને પહોંચાડવાનો હતો.
