ભારતીય ચેસ સ્ટાર અને યુવા ગ્રાન્ડમાસ્ટર આર. પ્રજ્ઞાનંધાએ આંતરરાષ્ટ્રીય સ્તરે ફરી એકવાર ભારતનું ગૌરવ વધાર્યું છે. યુનાઇટેડ સ્ટેટ્સમાં રમાયેલી પ્રતિષ્ઠિત ગ્રાન્ડ ચેસ ટૂર સેન્ટ લૂઇસ રેપિડ એન્ડ બ્લિટ્ઝ ટુર્નામેન્ટમાં શાનદાર પ્રદર્શન કરતા પ્રજ્ઞાનંધાએ ચેમ્પિયનશિપ પોતાના નામે કરી લીધી છે. આ વિજય સાથે તેણે વિશ્વ ચેસ જગતમાં પોતાનો દબદબો વધુ મજબૂત કર્યો છે.

ઉઝબેકિસ્તાનના ખેલાડી સાથે ડ્રો રમી ટાઇટલ પર કર્યો કબજો

20 વર્ષીય પ્રજ્ઞાનંધાએ આ સ્પર્ધામાં શરૂઆતથી જ ઉત્કૃષ્ટ રમતનું પ્રદર્શન કર્યું હતું. ટુર્નામેન્ટના પેનલ્ટીમેટ રાઉન્ડમાં તેનો મુકાબલો ઉઝબેકિસ્તાનના ગ્રાન્ડમાસ્ટર જાવોખિર સિંદારોવ સામે થયો હતો. આ રોમાંચક અને બુદ્ધિગમ્ય મેચ અંતે ડ્રોમાં પરિણમી હતી. જોકે, આ ડ્રો સાથે જ પ્રજ્ઞાનંધાએ પોતાનું ચેમ્પિયનશિપ ટાઇટલ સત્તાવાર રીતે સુરક્ષિત કરી લીધું હતું. સમગ્ર ટુર્નામેન્ટમાં શાનદાર રમત દાખવીને તેણે સંભવિત 35 માંથી કુલ 23 પોઈન્ટ્સ મેળવીને વિજેતા બનવાનું બહુમાન પ્રાપ્ત કર્યું છે.

5 દિવસ સુધી જાળવી રાખી લીડ, સિંદારોવ રહ્યો બીજા ક્રમે

યુએસમાં આયોજિત આ 5 દિવસીય લાંબી ઇવેન્ટ દરમિયાન ભારતીય ગ્રાન્ડમાસ્ટરે સતત પોતાની લીડ જાળવી રાખી હતી અને વિરોધી ખેલાડીઓ પર દબાણ બનાવ્યું હતું. અંતિમ તબક્કાની મેચોમાં ઉઝબેકિસ્તાનના જાવોખિર સિંદારોવે પ્રજ્ઞાનંધાને મજબૂત પડકાર આપવાનો પ્રયાસ કર્યો હતો, પરંતુ તે ટાઇટલ જીતવામાં નિષ્ફળ રહ્યો હતો. અંતે, સિંદારોવ 1.5 પોઇન્ટના માર્જિનની ખોટ સાથે સ્પર્ધામાં બીજા ક્રમે રહ્યો હતો.

જૂન માસમાં નોર્વે ચેસ 2026 માં પણ રચ્યો હતો ઇતિહાસ

અત્રે ઉલ્લેખનીય છે કે, આર. પ્રજ્ઞાનંધા માટે આ સિઝન અત્યંત સફળ રહી છે. અગાઉ જૂન મહિનાની શરૂઆતમાં જ તેણે ઓસ્લો ખાતે રમાયેલી નોર્વે ચેસ 2026 ટુર્નામેન્ટનો તાજ જીતીને ઇતિહાસ રચ્યો હતો. તે ટુર્નામેન્ટના 10મા અને અંતિમ રાઉન્ડમાં પ્રજ્ઞાનંધાએ જર્મનીના દિગ્ગજ ખેલાડી વિન્સેન્ટ કીમરને હરાવીને ટાઇટલ જીત્યું હતું.