સમગ્ર દેશની સાથે ગુજરાત રાજ્યમાં પણ ‘પોષણ માહ’ની ઉજવણીનો વિધિવત પ્રારંભ થઈ ગયો છે. બાળકો, સગર્ભા અને ધાત્રી માતાઓના સુદૃઢ સ્વાસ્થ્યને લક્ષમાં રાખીને રાજકોટ અને નર્મદા જિલ્લાના આંગણવાડી કેન્દ્રો ખાતે વિવિધ પોષણલક્ષી કાર્યક્રમો અને ઝુંબેશ હાથ ધરવામાં આવી છે.

રાજકોટમાં 8 ઓક્ટોબર સુધી ચાલશે વિશેષ કાર્યક્રમો 

રાજકોટ જિલ્લામાં આજથી શરૂ થયેલી પોષણ માહની ઉજવણી આગામી 8 ઓક્ટોબર સુધી ચાલશે. આ અંતર્ગત આંગણવાડીઓમાં બાળકોને તાજું અને ગરમ રાંધેલું પૌષ્ટિક ભોજન પૂરું પાડવા પર વિશેષ ભાર મૂકવામાં આવ્યો છે. બાળકોના યોગ્ય શારીરિક અને માનસિક વિકાસ માટે તેમના આહારમાં વિવિધતા અને પર્યાપ્ત પ્રોટીન મળી રહે તે માટે જાગૃતિ કાર્યક્રમો યોજાશે. આ ઉપરાંત, ‘પ્રધાનમંત્રી માતૃ વંદના યોજના’ અંતર્ગત માતાઓના સ્વાસ્થ્યને પ્રોત્સાહન આપવા માટે પણ વિવિધ કાર્યક્રમોનું સઘન આયોજન કરવામાં આવ્યું છે.

નર્મદા જિલ્લામાં ‘સુપોષિત નર્મદા’નો સંકલ્પ 

બીજી તરફ, નર્મદા જિલ્લામાં પણ એક માસ સુધી તમામ આંગણવાડી કેન્દ્રો ખાતે પોષણ માહની ભવ્ય ઉજવણી કરવામાં આવશે. અહીં વિવિધ થીમ આધારિત પોષણલક્ષી પ્રવૃત્તિઓ અને જનજાગૃતિ કાર્યક્રમો હાથ ધરવામાં આવશે. સરકારની વિવિધ પોષણલક્ષી યોજનાઓ અંગે લાભાર્થીઓને સચોટ માહિતી અને માર્ગદર્શન પૂરું પાડવામાં આવશે, જેથી તેઓ આ યોજનાઓનો મહત્તમ લાભ લઈ શકે.

સમુદાયની ભાગીદારીથી કુંપોષણ મુક્ત સમાજનું લક્ષ્ય 

આ સમગ્ર ઝુંબેશમાં બાળકો, સગર્ભા અને ધાત્રી માતાઓ તેમજ વાલીઓને વિશેષ રૂપે આવરી લેવામાં આવ્યા છે. લોકો અને સમુદાયની સક્રિય ભાગીદારીથી સમાજમાંથી કુપોષણને નાબૂદ કરી ‘સુપોષિત નર્મદા’ અને ‘સુપોષિત ગુજરાત’ના સંકલ્પને સાકાર કરવા માટે વહીવટી તંત્ર દ્વારા વ્યાપક પ્રયાસો કરવામાં આવી રહ્યા છે. આગામી દિવસોમાં આ અભિયાન થકી રાજ્યના છેવાડાના વિસ્તારોમાં પણ પોષણ અને આહાર અંગે મોટી જાગૃતિ આવશે તેવી અપેક્ષા સેવાઈ રહી છે.