કેન્દ્રીય ગૃહ અને સહકાર મંત્રી અમિત શાહે આજે અમરેલી જિલ્લાના દુધાળા ખાતે નવનિર્મિત ‘ગુજરાત ગૌરવ સરોવર’નું લોકાર્પણ કર્યું હતું. આ પ્રસંગે તેમણે જળ સંચય અને સિંચાઈ યોજનાઓની સફળતા વર્ણવી પ્રધાનમંત્રી નરેન્દ્ર મોદીના નેતૃત્વની પ્રશંસા કરી હતી. 

નર્મદાના નીરથી સૌરાષ્ટ્ર અને ઉત્તર ગુજરાત હરિયાળું બન્યું 

અમરેલીના દુધાળામાં યોજાયેલા કાર્યક્રમમાં ‘ગુજરાત ગૌરવ સરોવર’ને ખુલ્લું મુકતા કેન્દ્રીય મંત્રી અમિત શાહે જણાવ્યું હતું કે, પ્રધાનમંત્રી નરેન્દ્ર મોદીના સમયમાં ગુજરાતમાં દુકાળ ભૂતકાળ બની ગયો છે. રાજ્ય સરકારની સિંચાઈ યોજનાઓની સફળતાનો ચિતાર આપતા તેમણે કહ્યું હતું કે, સૌની યોજનાથી સૌરાષ્ટ્રમાં અને સુજલામ સુફલામ યોજના થકી ઉત્તર ગુજરાતમાં છેવાડાના વિસ્તારો સુધી નર્મદાના પવિત્ર નીર પહોંચાડવામાં આવ્યા છે. આ યોજનાઓ થકી રાજ્યના ખેડૂતો અને સામાન્ય નાગરિકોને પાણીની સમસ્યામાંથી કાયમી રાહત મળી છે.

પદ્મ પુરસ્કારો ગરીબોની નિઃસ્વાર્થ સેવા કરનાર માટે છે 

પોતાના સંબોધન દરમિયાન શ્રી શાહે દેશના સર્વોચ્ચ નાગરિક સન્માનોમાંના એક એવા પદ્મ પુરસ્કારોની વહેંચણી અંગે પણ મહત્વપૂર્ણ ટિપ્પણી કરી હતી. તેમણે સ્પષ્ટ કર્યું હતું કે, પદ્મ પુરસ્કાર કોઈ પરિવાર કે સગાંવહાલાંઓને આપવા માટે નથી. તેમણે ઉમેર્યું હતું કે, કોઈપણ જાતની પ્રસિદ્ધિ કે પ્રશંસાની અપેક્ષા રાખ્યા વિના જેઓ પોતાનું સમગ્ર જીવન ગરીબો અને જરૂરિયાતમંદોની સેવામાં વિતાવી દે છે, પદ્મ પુરસ્કાર ખરા અર્થમાં તેમના માટે જ છે.

અમદાવાદમાં 72મા પદવીદાન સમારોહ અને ‘લોક દરબાર’માં આપશે હાજરી 

અમરેલીના કાર્યક્રમ બાદ ગુજરાતના પ્રવાસે આવેલા ગૃહમંત્રી બપોર પછી અમદાવાદના વિવિધ કાર્યક્રમોમાં હાજરી આપશે. તેઓ સૌપ્રથમ ગુજરાત વિદ્યાપીઠના 72મા પદવીદાન સમારોહમાં ખાસ ઉપસ્થિત રહેશે. ત્યારબાદ તેઓ અમદાવાદના થલતેજ વિસ્તારમાં ટ્રોઇકા ફાર્માસ્યુટિકલ્સ દ્વારા આયોજિત ‘ફાર્મા ઈનોવા પુરસ્કાર સમારોહ 2026’માં હાજરી આપશે.

દિવસના અંતે, તેઓ પોતાના મતવિસ્તાર ઘાટલોડિયા અંતર્ગત આવતા બોપલ વિસ્તારમાં જશે. ત્યાં સ્થાનિક રહીશોના પ્રશ્નો સાંભળવા અને તેમની સાથે સીધો સંવાદ સાધવા માટે એક વિશેષ ‘લોક દરબાર’નું પણ આયોજન કરવામાં આવ્યું છે. અમરેલીમાં નિર્માણ પામેલા આ નવા સરોવરથી આગામી સમયમાં આસપાસના ભૂગર્ભ જળસ્તરમાં મોટો સુધારો જોવા મળશે.