હિમાલયના ખોળામાં આવેલા નેપાળ અને તિબેટમાં અચાનક આવેલા વિનાશક પૂરના કારણે ભારે તબાહી મચી છે. નેપાળમાં પૂરના કારણે મૃત્યુઆંક 1250 સુધી પહોંચી ગયો છે. ભારે વરસાદ અને કાટમાળ વચ્ચે બચાવકર્તાઓ ફસાયેલા લોકોને શોધવા માટે યુદ્ધના ધોરણે કામગીરી કરી રહ્યા છે.

ભોટેકોશી નદી અને સુરંગોમાં રેસ્ક્યુ ઓપરેશન ચાલુ 

ભોટેકોશી નદી અને ભૂગર્ભ પાવરહાઉસની સુરંગોમાં અનેક લોકો ફસાયા હોવાની આશંકા છે. નેપાળ આર્મી સહિતના સુરક્ષા જવાનો દ્વારા હેલિકોપ્ટર અને જમીન માર્ગે અત્યાર સુધીમાં 11,993 લોકોને સુરક્ષિત સ્થળે ખસેડવામાં આવ્યા છે. આ વિશાળ શોધ અને બચાવ કામગીરી માટે 21,314 જેટલા સુરક્ષા કર્મચારીઓને તૈનાત કરવામાં આવ્યા છે. અહેવાલો મુજબ, પૂર બાદ ગુમ થયેલા લોકોમાં 583 વિદેશી નાગરિકોનો પણ સમાવેશ થાય છે.

તિબેટ સરહદે પણ જળપ્રલય: 21 ના મોત, 541 લાપતા 

આ કુદરતી આફતની અસર માત્ર નેપાળ પૂરતી સીમિત નથી. ચીન તરફની નેપાળ સરહદ નજીક આવેલા તિબેટના ગિરોંગ કાઉન્ટીમાં પણ અચાનક આવેલા પૂરને કારણે 21 લોકોના મોત નિપજ્યા છે, જ્યારે હજુ પણ 541 જેટલા લોકો લાપતા છે, જેમની યુદ્ધના ધોરણે શોધખોળ ચાલી રહી છે.

ક્લાઈમેટ ચેન્જ અંગે પીએમ બાલેન્દ્ર શાહની ચિંતા 

નેપાળના વડાપ્રધાન બાલેન્દ્ર શાહે પ્રતિનિધિ ગૃહને સંબોધતા જણાવ્યું હતું કે, “આ આપત્તિનું પ્રમાણ અને પ્રકૃતિએ ક્લાઈમેટ ચેન્જને કારણે હિમાલય ક્ષેત્રમાં રહેતા લોકો સામે વધી રહેલા જોખમો અંગે ગંભીર પ્રશ્નો ઉભા કર્યા છે.” તેમણે ભારપૂર્વક કહ્યું કે આ આપત્તિ અને ક્લાઈમેટ ચેન્જ વચ્ચેના સંબંધને આંતરરાષ્ટ્રીય સમુદાય સમક્ષ મજબૂતીથી ઉઠાવવો જોઈએ. ઘણા ગુમ થયેલા સ્થાનિક લોકોની ભાળ ન મળતા તેમના પરિવારો દ્વારા પ્રતીકાત્મક અંતિમ સંસ્કાર પણ કરવામાં આવ્યા છે.

વૈશ્વિક સમુદાયની મદદ અને નિષ્ણાતોની તૈનાતી 

આ વિકટ પરિસ્થિતિમાં એશિયન ડેવલપમેન્ટ બેંક, વિશ્વ બેંક, યુરોપિયન યુનિયન અને સંયુક્ત રાષ્ટ્ર સહિતના આંતરરાષ્ટ્રીય વિકાસ ભાગીદારોએ નેપાળને સમર્થન આપવાનું વચન આપ્યું છે. આ ઉપરાંત, હાઇડ્રોપાવર પ્રોજેક્ટ સાઇટ્સ પર ફસાયેલા લોકોને બચાવવા માટે ભારત, ચીન અને દક્ષિણ કોરિયાની નિષ્ણાત ટીમોને પણ એકત્ર કરીને બચાવ કામગીરીમાં સક્રિયપણે જોડવામાં આવી રહી છે.