ભારત અને બેલ્જિયમ વચ્ચેના સંબંધોને વધુ ગાઢ બનાવવાના ઉદ્દેશ્યથી બેલ્જિયમના પ્રધાનમંત્રી બાર્ટ ડી વેવર 3 દિવસની ભારત મુલાકાતે નવી દિલ્હી પહોંચ્યા છે. આજે તેમણે પ્રધાનમંત્રી નરેન્દ્ર મોદી સાથે ઉચ્ચ સ્તરીય દ્વિપક્ષીય વાટાઘાટો હાથ ધરી છે, જેમાં વેપાર, રોકાણ, સંરક્ષણ અને સુરક્ષા સહિત અનેક વૈશ્વિક મુદ્દાઓ પર ચર્ચા કરવામાં આવશે.

રાજઘાટની મુલાકાત અને દ્વિપક્ષીય મંત્રણા 

બેલ્જિયમના પ્રધાનમંત્રી બાર્ટ ડી વેવર ગઈકાલે રાત્રે નવી દિલ્હી આવી પહોંચ્યા હતા. આજે સવારે તેમણે સૌથી પહેલાં રાજઘાટની મુલાકાત લઈને રાષ્ટ્રપિતા મહાત્મા ગાંધીને શ્રદ્ધાંજલિ અર્પણ કરી હતી. ત્યારબાદ, પીએમ નરેન્દ્ર મોદી સાથે તેમની દ્વિપક્ષીય વાટાઘાટો શરૂ થઈ હતી. આ ઉચ્ચ સ્તરીય બેઠકમાં બંને દેશો વચ્ચેના પરસ્પર હિતના પ્રાદેશિક અને વૈશ્વિક મુદ્દાઓ પર ગહન ચર્ચા ચાલી રહી છે. તેમની સાથે બેલ્જિયમના સંરક્ષણ મંત્રી થિયો ફ્રેન્કેન પણ આ મુલાકાતમાં જોડાયા છે. વાટાઘાટોના અંતે બંને દેશો વચ્ચે કેટલાક મહત્વપૂર્ણ કરારો પર હસ્તાક્ષર થવાની પ્રબળ સંભાવના છે.

ભારત-EU મુક્ત વેપાર અને આર્થિક સહયોગ 

ગયા વર્ષે ફેબ્રુઆરીમાં પદ સંભાળ્યા પછી પ્રધાનમંત્રી ડી વેવરની આ પ્રથમ ભારત મુલાકાત છે. તેઓ ભારતીય ઉદ્યોગ સંઘ (CII) ના એક વ્યાપાર કાર્યક્રમમાં ભારત-EU મુક્ત વેપાર કરારના સંદર્ભમાં મુખ્ય ભાષણ પણ આપશે. આ મુલાકાતથી વેપાર અને નવીનીકરણીય ઉર્જા જેવા ક્ષેત્રોમાં બંને દેશો વચ્ચે સહયોગ વધુ મજબૂત બનશે. યુરોપમાં બેલ્જિયમ ભારત માટે એક અત્યંત મહત્વપૂર્ણ આર્થિક ભાગીદાર છે. વર્ષ 2025-26 માં બંને દેશો વચ્ચેનો દ્વિપક્ષીય વેપાર 13 અબજ ડોલરને પાર કરી ગયો હતો, જેમાં એન્ટવર્પના હીરા ઉદ્યોગનો વેપાર મોટો ભાગ ભજવે છે.

રોકાણ, સંરક્ષણ અને ઐતિહાસિક સંબંધો 

ભારત અને બેલ્જિયમ વચ્ચે 3 સદીઓથી જૂના ઐતિહાસિક સંબંધો છે. સપ્ટેમ્બર 1947 માં સ્વતંત્ર ભારત સાથે રાજદ્વારી સંબંધો સ્થાપિત કરનારા પ્રથમ યુરોપિયન દેશોમાં બેલ્જિયમ સામેલ હતું. બેલ્જિયમ ભારતમાં વિદેશી રોકાણ (FDI) નો પણ મોટો સ્ત્રોત છે. એપ્રિલ 2000 થી ડિસેમ્બર 2025 સુધીમાં બેલ્જિયમમાંથી ભારતમાં આશરે 4.2 બિલિયન ડોલરનું રોકાણ આવ્યું છે. હવે સંરક્ષણ સહયોગ પણ આ ભાગીદારીનું નવું અને અગત્યનું પાસું બની રહ્યું છે, જેના ભાગરૂપે બેલ્જિયમે નવી દિલ્હીમાં પોતાના સંરક્ષણ એટેચીની નિમણૂક કરી છે.