મહેસાણા જિલ્લાના સતલાસણા પોલીસ સ્ટેશનમાં ફરજ બજાવતા એક કોન્સ્ટેબલ અને તેના સાગરીતને એન્ટી-કરપ્શન બ્યુરો (ACB) ની ટીમે 83,000 રૂપિયાની લાંચ લેતા રંગેહાથ ઝડપી લીધા છે. જુગાર કેસના આરોપીઓને પોલીસ સ્ટેશનમાં હાજર થવા પર માર ન મારવાના બદલામાં આ લાંચ માંગવામાં આવી હતી. ફરિયાદીએ 1064 ટોલ-ફ્રી હેલ્પલાઇન પર સંપર્ક કરતા ACB એ છટકું ગોઠવીને બંને આરોપીઓને દબોચી લીધા હતા.

જુગારના કેસમાં માર ન મારવા લાંચની માંગ 

ACB ની ફરિયાદ મુજબ, ફરિયાદી અને અન્ય કેટલાક લોકો સામે સતલાસણા પોલીસ સ્ટેશનમાં જુગારનો કેસ નોંધાયો હતો. આ કેસના સંદર્ભમાં તમામ આરોપીઓએ પોલીસ સ્ટેશનમાં હાજર થવાનું હતું. સતલાસણા પોલીસ સ્ટેશનમાં પોસ્ટેડ કોન્સ્ટેબલ કાનજી ચૌધરીએ ફરિયાદીનો સંપર્ક કરી, પોલીસ સ્ટેશનમાં હાજરી વખતે માર ન મારવા માટે 1 લાખ રૂપિયાની લાંચની માંગણી કરી હતી. વાટાઘાટોના અંતે લાંચની રકમ 83,000 રૂપિયા નક્કી કરવામાં આવી હતી, જે 31 ઓગસ્ટના રોજ ચૂકવવાનું નક્કી થયું હતું.

1064 હેલ્પલાઇન પર ફરિયાદ બાદ ACB નું છટકું 

ફરિયાદી લાંચ આપવા માંગતા ન હોવાથી તેમણે તરત જ ACB ની ટોલ-ફ્રી હેલ્પલાઇન 1064 પર સંપર્ક કરીને સત્તાવાર ફરિયાદ નોંધાવી હતી. આ ફરિયાદના આધારે, અમદાવાદ ACB ફિલ્ડ-3 ના પોલીસ ઇન્સ્પેક્ટર ડી. બી. મહેતા અને તેમની ટીમે 31 ઓગસ્ટના રોજ છટકું ગોઠવ્યું હતું. સતલાસણામાં સૂરજ કોમ્પ્લેક્સની સામેના જાહેર માર્ગ પર એક મિત્રની કારમાં આરોપીઓ લાંચ લેવા આવ્યા હતા. તે સમયે કોન્સ્ટેબલ કાનજી ચૌધરી અને તેના સ્થાનિક સાગરીત આશિષ ચૌધરી (રહે. નવાવાસ-રાજપુર, સતલાસણા) ને ફરિયાદી પાસેથી 83,000 રૂપિયા સ્વીકારતા જ ACB ની ટીમે રંગેહાથ પકડી લીધા હતા.

લાંચની રકમ રિકવર, વધુ તપાસ શરૂ 

ACB ના અધિકારીઓએ ઘટનાસ્થળેથી જ 83,000 રૂપિયાની લાંચની પૂરેપૂરી રકમ રિકવર કરી લીધી છે. બંને આરોપીઓ વિરુદ્ધ ભ્રષ્ટાચાર નિવારણ અધિનિયમ હેઠળ ગુનો નોંધીને કાયદેસરની કાર્યવાહી શરૂ કરવામાં આવી છે. આ પોલીસકર્મી ભૂતકાળમાં પણ આવા કોઈ ભ્રષ્ટાચારના કિસ્સાઓમાં સંડોવાયેલો છે કે કેમ, તે દિશામાં ACB દ્વારા હવે સઘન તપાસ હાથ ધરવામાં આવી છે.