ભારતના અનુભવી બેડમિન્ટન ખેલાડી કિદામ્બી શ્રીકાંતે ચીનના શેઝેન ખાતે રમાઈ રહેલી ચાઇના માસ્ટર્સ સુપર 750 ટુર્નામેન્ટમાં શાનદાર પ્રદર્શન કર્યું છે. શ્રીકાંતે મેન્સ સિંગલ્સની પ્રી-ક્વાર્ટર ફાઇનલ મેચમાં કેનેડાના વિશ્વના 9મા ક્રમાંકિત ખેલાડી વિક્ટર લાઇને સીધી ગેમમાં હરાવીને ક્વાર્ટર ફાઇનલમાં દબદબાભેર પ્રવેશ કર્યો છે.

અનુભવી શ્રીકાંતે સર્જ્યો મોટો અપસેટ 

આ વર્ષની શરૂઆતમાં યુએસ ઓપન સુપર 300 ટુર્નામેન્ટની ફાઇનલમાં પહોંચેલા 33 વર્ષીય શ્રીકાંતે કોર્ટ પર પોતાનો બહોળો અનુભવ દર્શાવ્યો હતો. તેણે શાનદાર રમતનું પ્રદર્શન કરતા કેનેડિયન શટલર વિક્ટર લાઇને 21-18, 21-19 ના સ્કોરથી હરાવીને મોટો અપસેટ સર્જ્યો હતો. નોંધનીય છે કે, વિક્ટર લાઇએ ગયા મહિને જ નવી દિલ્હીમાં વર્લ્ડ ચેમ્પિયનશિપનો પોતાનો બીજો બ્રોન્ઝ મેડલ જીત્યો હતો, પરંતુ શ્રીકાંતની આક્રમક રમત સામે તે ટકી શક્યો ન હતો.

આગામી રાઉન્ડમાં હોંગકોંગના ખેલાડી સાથે ટક્કર 

ભૂતપૂર્વ વિશ્વ નંબર 1 અને વર્ષ 2021 ની વર્લ્ડ ચેમ્પિયનશિપમાં સિલ્વર મેડલ જીતનાર કિદામ્બી શ્રીકાંત હવે ટુર્નામેન્ટના અંતિમ તબક્કા તરફ આગળ વધી રહ્યો છે. ક્વાર્ટર ફાઇનલ મુકાબલામાં શ્રીકાંતનો સામનો હોંગકોંગના મજબૂત ખેલાડી લી ચેઉક યિયુ સામે થશે. શ્રીકાંતના ફોર્મને જોતા ભારતીય ચાહકોને તેની પાસેથી મેડલની પ્રબળ આશા છે.

મહિલા સિંગલ્સમાં તન્વી શર્માની સંઘર્ષપૂર્ણ હાર 

બીજી તરફ, મહિલા સિંગલ્સની ઈવેન્ટમાં ભારતને નિરાશા સાંપડી છે. તાજેતરમાં તાઈપેઈ ઓપન વર્લ્ડ ટૂર સુપર 300 નું ટાઇટલ જીતનાર ભારતીય ખેલાડી તન્વી શર્માએ પોતાના બીજા રાઉન્ડની મેચમાં હિંમતભેર લડત આપી હતી. જોકે, ત્રણ ગેમ સુધી ચાલેલા અત્યંત રોમાંચક મુકાબલામાં તેને જાપાનની વિશ્વ નંબર 9 ખેલાડી તોમોકા મિયાઝાકી સામે 17-21, 21-18, 16-21 ના સ્કોરથી હારનો સામનો કરવો પડ્યો હતો. આ હાર સાથે તન્વીનું ચાઇના માસ્ટર્સમાં અભિયાન સમાપ્ત થયું છે.