વિદેશ મંત્રી ડૉ. એસ. જયશંકરે આજે ક્રેમલિન ખાતે રશિયાના રાષ્ટ્રપતિ વ્લાદિમીર પુતિન સાથે મુલાકાત કરી. રશિયામાં ભારતીય રાજદૂત વિનય કુમાર અને સંયુક્ત સચિવ મયંક સિંહ પણ પ્રતિનિધિમંડળનો ભાગ હતા. બંને નેતાઓએ ભારત-રશિયા સંબંધોને મજબૂત બનાવવા અને મુખ્ય ક્ષેત્રોમાં સહયોગ વધારવાના માર્ગો પર ચર્ચા કરી. આ બેઠકમાં દ્વિપક્ષીય વેપાર, આર્થિક સહયોગ અને આગામી ઉચ્ચ-સ્તરીય શિખર સંમેલનોની તૈયારીઓ પર ધ્યાન કેન્દ્રિત કરાયું. બેઠકમાં, ડૉ. એસ. જયશંકરે આર્થિક સહયોગ, વેપાર અને ઉર્જા સહિતના ક્ષેત્રોમાં ભારત-રશિયાની મજબૂત અને વધતી જતી ભાગીદારી પર પ્રકાશ પાડ્યો. ડૉ. જયશંકરે કહ્યું કે, બંને પક્ષોએ દિવસની શરૂઆતમાં આંતર-સરકારી આયોગની બેઠક યોજી હતી અને તેના પરિણામને સકારાત્મક ગણાવ્યું હતું.
બેઠક દરમિયાન, રશિયાના રાષ્ટ્રપતિ પુતિને ભારતને ખાતરનો પુરવઠો વધારવાની ઓફર કરી, કહ્યું કે મોસ્કો ભારતીય ખેડૂતો અને દેશના કૃષિ ક્ષેત્રને ટેકો આપવા માટે પગલાં લઈ રહ્યું છે. તેમણે આ વર્ષે રશિયા અને ભારત વચ્ચેના વેપારમાં થયેલા વિકાસ પર પણ પ્રકાશ પાડ્યો.
