અમદાવાદની અદાણી ઇન્ટરનેશનલ સ્કૂલ ખાતે આજથી બે દિવસીય ISSO એટલે કે ઇન્ટરનેશનલ સ્કૂલ્સ સ્પોર્ટ્સ ઓર્ગેનાઇઝેશન ચેસ રમતનો પ્રારંભ થયો છે. આ ટુર્નામેન્ટના ઉદઘાટન સમારોહમાં ભારતના યુવા ચેસ ગ્રાન્ડમાસ્ટર આર. પ્રજ્ઞાનંધા અને ગુજરાતના ગૃહ રાજ્યમંત્રી હર્ષ સંઘવીએ ખાસ ઉપસ્થિત રહીને દેશભરમાંથી આવેલા 400 થી વધુ યુવા ચેસ ખેલાડીઓનો ઉત્સાહ વધાર્યો હતો.
દેશભરની 102 શાળાઓના 427 ખેલાડીઓ લઈ રહ્યા છે ભાગ
આજે અને આવતીકાલે એમ બે દિવસ માટે આયોજિત આ રાષ્ટ્રીય સ્તરની સ્પર્ધામાં સમગ્ર ભારતની 102 આંતરરાષ્ટ્રીય શાળાઓના 427 ખેલાડીઓ ભાગ લઈ રહ્યા છે. આ ચેસ ગેમ્સમાં છોકરાઓ અને છોકરીઓ બંને માટે અંડર-11, અંડર-14, અંડર-17 અને અંડર-19 જેવી વિવિધ વય શ્રેણીઓ રાખવામાં આવી છે. આ રમતગમતની ઇવેન્ટને અદાણી ગ્રૂપ દ્વારા વિશેષ સમર્થન પૂરું પાડવામાં આવ્યું છે.
દબાણ હેઠળ રમત વિકસાવવા આવી સ્પર્ધા જરૂરી: ગ્રાન્ડમાસ્ટર પ્રજ્ઞાનંધા
ઉદઘાટન પ્રસંગે યુવા સહભાગીઓ સાથે સંવાદ કરતા ગ્રાન્ડમાસ્ટર આર. પ્રજ્ઞાનંધાએ તેમને આત્મવિશ્વાસ સાથે સ્પર્ધામાં ઉતરવા પ્રોત્સાહિત કર્યા હતા. તેમણે જણાવ્યું હતું કે, “ભારતભરની શાળાઓમાંથી આટલા બધા યુવા ખેલાડીઓને એકસાથે આ સ્તરે સ્પર્ધા કરતા જોવા અદ્ભુત છે. યુવા ખેલાડીઓને દબાણ હેઠળ તેમની રમત વિકસાવવામાં અને સ્પર્ધાત્મક વાતાવરણમાં અનુકૂલન સાધવામાં આવી ટુર્નામેન્ટ ખૂબ મહત્વપૂર્ણ ભૂમિકા ભજવે છે.” તેમણે દરેક ખેલાડીને ચેસ પ્રત્યેનો જુસ્સો જાળવી રાખી સખત મહેનત કરવા શુભેચ્છા પાઠવી હતી.
શાળા કક્ષાએથી જ પ્રતિભા ઓળખવી દેશના ભવિષ્ય માટે અગત્યની: હર્ષ સંઘવી
નાયબ મુખ્યમંત્રી હર્ષ સંઘવીએ નાની ઉંમરથી જ ખેલ પ્રતિભાને ઓળખવા અને તેને ઉછેરવા પર ભાર મૂક્યો હતો. તેમણે કહ્યું કે, પ્રતિભાને વહેલી તકે શોધવી અને તેને વિકસાવવા માટે શાળા-સ્તરે યોગ્ય પ્લેટફોર્મ પૂરું પાડવું એ ભારતના રમતગમતના ભવિષ્ય માટે અત્યંત મહત્વપૂર્ણ છે. ISSO ચેસ ગેમ્સ જેવી ઇવેન્ટ્સ યુવા ખેલાડીઓને નવું એક્સપોઝર મેળવવાની અને રમતગમતની સફરમાં આગળ વધવાની ઉત્તમ તક આપે છે.
વ્યૂહાત્મક વિચારસરણી અને એકાગ્રતા વધારવાનો હેતુ
આ સ્પર્ધાનો મુખ્ય ઉદ્દેશ્ય યુવા ખેલાડીઓમાં વ્યૂહાત્મક વિચારસરણી, એકાગ્રતા, નિર્ણય લેવાની ક્ષમતા અને સ્થિતિસ્થાપકતાને પ્રોત્સાહન આપવાનો છે. ISSO ના સ્થાપક આકાંક્ષા થાપકે આયોજનની સફળતા અંગે ખુશી વ્યક્ત કરતા જણાવ્યું હતું કે, 102 શાળાઓના 427 વિદ્યાર્થીઓની ભાગીદારી એ શાળા સ્તરે સ્પર્ધાત્મક ચેસમાં વધી રહેલા રસનું અદ્ભુત પ્રતિબિંબ છે. વિદ્યાર્થીઓને પ્રોત્સાહિત કરવા માટે ગ્રાન્ડમાસ્ટર પ્રજ્ઞાનંધાની ઉપસ્થિતિએ આ ઉદઘાટનને વધુ સાર્થક બનાવ્યું છે.
