ગુજરાત વડી અદાલત દ્વારા નર્મદા જિલ્લાની ડેડિયાપાડા બેઠકના આમ આદમી પાર્ટીના ધારાસભ્ય ચૈતર વસાવાને મોટી રાહત આપતા વચગાળાના જામીન મંજૂર કરવામાં આવ્યા છે. આગામી 9 તારીખથી શરૂ થઈ રહેલા ગુજરાત વિધાનસભાના ચોમાસુ સત્રમાં હાજરી આપવા માટે ધારાસભ્ય દ્વારા કરવામાં આવેલી જામીન અરજી પર સુનાવણી હાથ ધરી અદાલતે તેમને કડક શરતોને આધીન 7 દિવસના જામીન આપ્યા છે.

વિધાનસભા સત્રમાં હાજરી આપવા માટે કરી હતી અરજી 

રાજ્યમાં આગામી 9 તારીખથી ગુજરાત વિધાનસભાનું ચોમાસુ સત્ર શરૂ થવા જઈ રહ્યું છે. એક લોકપ્રતિનિધિ તરીકે પોતાના વિસ્તારના પ્રશ્નો રજૂ કરવા અને સત્રની સમગ્ર કામગીરીમાં સહભાગી થવાના હેતુથી ધારાસભ્ય ચૈતર વસાવા વતી હાઇકોર્ટમાં વચગાળાના જામીન મેળવવા અરજી કરવામાં આવી હતી. અદાલતે બંને પક્ષોની દલીલો સાંભળ્યા બાદ પ્રજાના પ્રતિનિધિ તરીકે વિધાનસભાની કાર્યવાહીમાં ઉપસ્થિત રહેવાની મંજૂરી આપતા આ વચગાળાની રાહત આપી છે.

હાઇકોર્ટે લાદી આકરી શરતો: ગાંધીનગર ન છોડવાનો આદેશ 

હાઇકોર્ટે ચૈતર વસાવાને રાહત આપવાની સાથે જ કેટલીક આકરી શરતો પણ નિર્ધારિત કરી છે. અદાલતના આદેશ અનુસાર, જામીન સમયગાળા દરમિયાન તેઓ ગાંધીનગરની હદ છોડીને બહાર જઈ શકશે નહીં. આ ઉપરાંત, વિધાનસભા સત્ર દરમિયાન તેમની ઉપસ્થિતિ ફરજિયાત રહેશે. અદાલતે અન્ય એક મહત્વપૂર્ણ શરત મૂકતા સ્પષ્ટ આદેશ કર્યો છે કે જામીન દરમિયાન તેઓ કોઈપણ પ્રિન્ટ, ઇલેક્ટ્રોનિક કે ડિજિટલ મીડિયા સાથે વાતચીત કરી શકશે નહીં.

ચોમાસુ સત્ર પૂર્ણ થયા બાદ જેલમાં જવું પડશે 

અદાલતના આ ચુકાદાથી તેમના સમર્થકો અને પક્ષના કાર્યકરોમાં રાહતની લાગણી જોવા મળી રહી છે. ડેડિયાપાડા વિસ્તારના પ્રશ્નોને સભાગૃહમાં વાચા આપવા માટે ધારાસભ્યને આ મંજૂરી મળતા તેઓ સત્રમાં ભાગ લઈ શકશે. 7 દિવસનો જામીન સમયગાળો પૂર્ણ થયા બાદ તેમણે શરતો અનુસાર ફરી કાયદાકીય કસ્ટડીમાં પરત જવું પડશે.