સુરત જિલ્લાના અંબિકા તાલુકાના લસણપોર ગામના 115 વર્ષથી વધુ વય ધરાવતા વયોવૃદ્ધ અને સ્વાતંત્ર્ય સેનાની રૂખીબેન માજીભાઈ પટેલનું દિશા ધોડિયા સમાજ સંગઠન દ્વારા વિશેષ સન્માન કરવામાં આવ્યું છે. 5 પેઢીઓ જોઈ ચૂકેલા રૂખીબેનનું સ્વસ્થ જીવન અને દેશની આઝાદીમાં તેમનું યોગદાન માત્ર તેમના પરિવાર માટે જ નહીં, પરંતુ સમગ્ર સમાજ માટે ગૌરવનો વિષય બન્યું છે.

આઝાદીની ચળવળ અને અનેક ઐતિહાસિક પરિવર્તનોના સાક્ષી 

રૂખીબેનનું જીવન અંગ્રેજ શાસનથી લઈને આધુનિક ભારત સુધીની સફરનું જીવંત ઉદાહરણ છે. તેમણે દેશની સ્વાતંત્ર્ય ચળવળમાં પણ પોતાનું મહત્વપૂર્ણ યોગદાન આપ્યું હતું. ઇતિહાસના પાનાઓમાં ભલે તેમનું નામ નોંધાયું ન હોય, પરંતુ આવા અનામી અને અજાણ્યા સ્વાતંત્ર્ય સેનાનીઓના બલિદાન અને યોગદાન આજની પેઢી માટે જાણવા અત્યંત જરૂરી છે. તેમણે ગુલામીથી લઈને આઝાદી અને વિકાસના અનેક તબક્કાઓ પોતાની આંખે જોયા છે.

સખત પરિશ્રમ અને શુદ્ધ ખોરાક છે તંદુરસ્તીનું રહસ્ય 

115 વર્ષની વયે પણ તેમની તંદુરસ્તી અકબંધ છે. પોતાના જૂના દિવસોને યાદ કરતા રૂખીબેન જણાવે છે કે, “અમારા જમાનામાં ટ્રેક્ટર નહોતા. આખો દિવસ બળદ પાછળ ચાલીને હળ ચલાવતા. સૂરજ ઊગે ત્યારથી આથમવા સુધી સીમમાં સતત કામ કરતા. અનાજની લણણી પણ હાથેથી જ કરતા.” તેઓ માને છે કે વાડીએ પગપાળા જવું, સખત મહેનત અને શુદ્ધ તાજા શાકભાજીના સેવનથી જ તેમની આ તંદુરસ્તી આજે પણ જળવાઈ રહી છે.

દિશા ધોડિયા સમાજ સંગઠન દ્વારા પ્રેરણાદાયક શતાયુ સન્માન 

સમાજના વડીલો પ્રત્યે આદર વ્યક્ત કરવા માટે દિશા ધોડિયા સમાજ સંગઠન, વસરાઈ દ્વારા રૂખીબેનનું તેમના ઘરે જઈને ‘શતાયુ સન્માન’ કરવામાં આવ્યું હતું. આ પ્રસંગે તેમના પરિવારજનો, સગાસંબંધીઓ અને સમાજના આગેવાનો ઉપસ્થિત રહ્યા હતા. સંસ્થાનો મુખ્ય ઉદ્દેશ માત્ર સન્માન પૂરતો મર્યાદિત નથી, પરંતુ વડીલોના અનુભવ, સાદગી અને સંસ્કારોને નવી પેઢી સુધી પહોંચાડવાનો અને તેમની વચ્ચે સંવાદનો સેતુ બાંધવાનો છે.

અન્ય ગામોમાં પણ વડીલોના સન્માનની ઝુંબેશ ચાલુ રહેશે 

ફૂલવાડી અને ડોલવણ ઉમરા જેવા ગામોમાં પણ આજે 100 વર્ષથી વધુ વયના વડીલો હયાત છે, જેઓ સમાજની જીવંત ધરોહર સમાન છે. આગામી સમયમાં સમાજ સંગઠન દ્વારા 100 વર્ષથી વધુ ઉંમરના આવા અન્ય વડીલોને શોધીને તેમનું સન્માન કરવાની પરંપરા ચાલુ રાખવાનો સંકલ્પ લેવામાં આવ્યો છે.