બિહાર રાજ્યમાં પૂરની સ્થિતિ સતત ગંભીર બની રહી છે. ગંગા, ગંડક અને કોસી નદીઓ બાદ હવે સોન નદીના જળસ્તરમાં થયેલા વધારાને કારણે ઉત્તર, મધ્ય અને દક્ષિણ બિહારના અનેક વિસ્તારો જળમગ્ન થયા છે. પૂરના પાણી અનેક જિલ્લાઓના નીચાણવાળા વિસ્તારોમાં ફરી વળતાં જનજીવન ભારે પ્રભાવિત થયું છે અને વહીવટી તંત્ર દ્વારા યુદ્ધના ધોરણે રાહત-બચાવ કામગીરી હાથ ધરવામાં આવી છે.
ભાગલપુર સહિતના જિલ્લાઓમાં ગંગા નદીના પૂરનો પ્રકોપ
પ્રાપ્ત અહેવાલો મુજબ, ગંગા નદીના પૂરના પાણી ભાગલપુર, ખગરિયા, સમસ્તીપુર, પટના, બક્સર, ભોજપુર અને વૈશાલી જિલ્લાના નીચાણવાળા વિસ્તારોમાં ફેલાઈ ગયા છે. આ પરિસ્થિતિમાં ભાગલપુર જિલ્લો પૂરથી સૌથી વધુ અસરગ્રસ્ત જોવા મળી રહ્યો છે. આ અંગે બિહારના નાયબ મુખ્યમંત્રી અને જળ સંસાધન મંત્રી વિજય કુમાર ચૌધરીએ નિવેદન આપતા જણાવ્યું હતું કે, “જિલ્લામાં પૂરની સ્થિતિ ખતરનાક હોવા છતાં, તે હાલ સંપૂર્ણપણે નિયંત્રણમાં છે.”
સોન નદીમાં પૂર: ઇન્દ્રપુરી બેરેજના 69 દરવાજા ખોલાયા
રોહતાસ જિલ્લામાં બાણસાગર ડેમમાંથી મોટા પ્રમાણમાં પાણી છોડવામાં આવતા સોન નદીના જળસ્તરમાં ભયજનક સપાટીએ વધારો નોંધાયો છે. નદીમાં પૂરની સ્થિતિ સર્જાતા તંત્ર દ્વારા સાવચેતીના ભાગરૂપે ઇન્દ્રપુરી બેરેજના તમામ 69 દરવાજા તાત્કાલિક ખોલી નાખવામાં આવ્યા છે. ડેમમાંથી પાણી છોડાતા નજીકના નદીકાંઠાના અને નીચાણવાળા વિસ્તારોમાં પાણી વધુ ફેલાવાની ભીતિ સેવાઈ રહી છે.
ઔરંગાબાદ અને જહાનાબાદમાં નદીઓ ગાંડીતૂર, 3 પુલ ડૂબ્યા
ઔરંગાબાદ જિલ્લામાં પણ સોન, બાટાણે, પુનપુન, ધવા, અડારી, મદાર અને કેશર સહિતની નદીઓમાં જળસ્તર વધતા અનેક ગામો પૂરની ઝપેટમાં આવી ગયા છે. બીજી તરફ, જહાનાબાદ જિલ્લામાં દર્ધા નદીમાં આવેલા પૂરના કારણે જાફરગંજ, શકુરાબાદ અને સાંઈ મંદિર પાસે આવેલા 3 પુલ અને કલ્વર્ટ પરથી પૂરના ધસમસતા પાણી વહી રહ્યા છે, જેનાથી વાહનવ્યવહાર ખોરવાયો છે.
અસરગ્રસ્ત વિસ્તારોમાં રાહત અને બચાવ કામગીરી શરૂ
બક્સર, ખગરિયા, સમસ્તીપુર અને વૈશાલી જિલ્લાઓના નદી કિનારાના વિસ્તારોમાં પણ પૂરની વ્યાપક અસર જોવા મળી છે. આ વિકટ પરિસ્થિતિને પહોંચી વળવા માટે સ્થાનિક વહીવટી તંત્ર એક્શનમાં આવ્યું છે અને તમામ અસરગ્રસ્ત વિસ્તારોમાં રાહત તેમજ બચાવ કામગીરી પૂરજોશમાં શરૂ કરી દેવામાં આવી છે. ભવિષ્યમાં નદીઓના જળસ્તરમાં ઘટાડો ન થાય ત્યાં સુધી લોકોને સુરક્ષિત સ્થળોએ રહેવા અપીલ કરવામાં આવી છે.
