કચ્છના હવાઈ મુસાફરો માટે આનંદના સમાચાર છે. ભુજથી દેશની રાજધાની દિલ્હી જવા માટે એર ઇન્ડિયા દ્વારા વધુ એક નવી ફ્લાઇટની શરૂઆત કરવામાં આવી છે. આ નવી મોર્નિંગ ફ્લાઇટ શરૂ થતાં કચ્છના મુસાફરોને હવે દિલ્હી આવવા-જવા માટે વધુ એક સારો વિકલ્પ મળ્યો છે, જેનાથી તેમની મુસાફરી વધુ સરળ, આરામદાયક અને ઝડપી બનશે.

164 મુસાફરોની ક્ષમતા અને ફ્લાઇટનું સમયપત્રક 

એર ઇન્ડિયા દ્વારા શરૂ કરવામાં આવેલી આ નવી ફ્લાઇટ 164 મુસાફરોને બેસાડવાની ક્ષમતા ધરાવે છે. આ ફ્લાઇટના સમયપત્રક પર નજર કરીએ તો, નવી ફ્લાઇટ ભુજથી સવારે 8:15 વાગ્યે ઉડાન ભરશે અને 9:45 વાગ્યે દિલ્હી પહોંચશે. સામા પક્ષે, દિલ્હીથી આ ફ્લાઇટ વહેલી સવારે 5:50 વાગ્યે ઉપડશે અને સવારે 7:35 વાગ્યે ભુજ એરપોર્ટ પર પહોંચશે. સવારના સમયની આ નવી હવાઈ સેવાથી ખાસ કરીને વેપારીઓ અને ઓફિસના કામકાજ અર્થે જતા લોકોને દિવસભરનો સમય મળી રહેશે.

ભુજથી દિલ્હી અને મુંબઈ માટે દૈનિક 4 ફ્લાઇટની સુવિધા ઉપલબ્ધ 

નોંધનીય છે કે, અત્યાર સુધી ભુજથી દિલ્હી જવા માટે માત્ર સાંજના સમયની એક જ ફ્લાઇટ કાર્યરત હતી, જેના કારણે સવારે દિલ્હી જવા માંગતા મુસાફરોને મુશ્કેલી પડતી હતી. આ નવી ફ્લાઇટ શરૂ થતાં હવે મુસાફરોની તે માંગ પૂરી થઈ છે. આ ઉપરાંત, ભુજથી મુંબઈ માટે પણ સવારે અને બપોરે ફ્લાઇટ સેવા પહેલેથી જ ઉપલબ્ધ છે. આમ, નવી ફ્લાઇટના ઉમેરા સાથે હવે ભુજથી દેશના બે સૌથી મોટા મહાનગરો મુંબઈ અને દિલ્હી વચ્ચે રોજના કુલ 4 ફ્લાઇટની સુવિધા કાર્યરત થઈ ગઈ છે.

એરપોર્ટ પર વોટર કેનન સેલ્યુટથી વિશેષ સ્વાગત 

આ નવી ફ્લાઇટે જ્યારે દિલ્હીથી ઉડાન ભરીને પ્રથમ વખત ભુજ એરપોર્ટ પર આગમન કર્યું, ત્યારે તેનું ભવ્ય સ્વાગત કરવામાં આવ્યું હતું. એરપોર્ટ ઓથોરિટી દ્વારા રનવે પર નવી ફ્લાઇટને પરંપરાગત રીતે ‘વોટર કેનન સેલ્યુટ’ એટલે કે પાણીની તોપની સલામી આપવામાં આવી હતી.