માનસિક અસંતુલનને કારણે પોતાના જ પેટમાં ચાકુ મારી દેનાર એક 36 વર્ષીય દર્દીનો જીવ બચાવવામાં સિવિલ હોસ્પિટલના તબીબોને મોટી સફળતા મળી છે. જાહેર રજાના દિવસે પણ તબીબોએ ઉત્કૃષ્ટ ટીમવર્ક દાખવીને ગણતરીની મિનિટોમાં ઓપરેશન શરૂ કરી અત્યંત ગંભીર હાલતમાં આવેલા આ દર્દીને નવું જીવન આપ્યું છે.

ગંભીર હાલતમાં દર્દીને તાત્કાલિક હોસ્પિટલ લવાયો 

પ્રાપ્ત વિગતો અનુસાર, ગત 29 ઓગસ્ટની સવારે એક 36 વર્ષીય પુરુષને અત્યંત ગંભીર હાલતમાં સિવિલ હોસ્પિટલના તાત્કાલિક સારવાર વિભાગમાં લાવવામાં આવ્યો હતો. આ દર્દીએ માનસિક અસંતુલનની સ્થિતિમાં પોતાના જ પેટના ભાગે ચાકુના ગંભીર ઘા મારી દીધા હતા. આ હુમલાના કારણે તેના પેટની આગળની દીવાલને ભારે નુકસાન પહોંચ્યું હતું અને લોહી વહી રહ્યું હતું.

માત્ર 45 મિનિટમાં જ શરૂ કરાઈ શસ્ત્રક્રિયા 

હોસ્પિટલમાં દર્દી ભાનમાં હતો પરંતુ તેની સ્થિતિ ખૂબ નાજુક હતી. સિવિલ હોસ્પિટલની સર્જરી અને એનેસ્થેસિયા ટીમે પરિસ્થિતિની ગંભીરતા પારખીને ક્ષણનો પણ વિલંબ કર્યો ન હતો. દર્દીને હોસ્પિટલ લાવ્યાની માત્ર 45 મિનિટમાં જ, એટલે કે સવારે 9:30 વાગ્યે તેને ઓપરેશન થિયેટરમાં લઈ જઈને તાત્કાલિક શસ્ત્રક્રિયા શરૂ કરી દેવામાં આવી હતી.

2 કલાકની જટિલ સર્જરીમાં મળ્યું જીવનદાન 

આશરે 1.5 થી 2 કલાક સુધી ચાલેલી આ જટિલ સર્જરીમાં તબીબોની ટીમે પેટની દીવાલનું સફળતાપૂર્વક ઓપરેશન કર્યું હતું. ભવિષ્યમાં પૂરતું પોષણ મળી રહે તે માટે દર્દીના આંતરડામાં ખોરાક આપવા માટે ખાસ નળી પણ મૂકવામાં આવી હતી. આ ઉપરાંત, અન્ય તમામ આંતરિક અંગોની ઝીણવટભરી ચકાસણી કરીને દર્દીને સંપૂર્ણપણે ખતરાની બહાર લાવવામાં આવ્યો હતો.

સઘન સારવાર બાદ દર્દીની સ્થિતિ સંપૂર્ણ સ્થિર 

સફળ ઓપરેશન બાદ દર્દીને આઈસીયુ (ICU) સર્વેલન્સમાં નિરીક્ષણ હેઠળ રાખવામાં આવ્યો હતો. તબીબો અને નર્સિંગ સ્ટાફની સતત દેખરેખ અને ગુણવત્તાસભર સારવારના પરિણામે 5 થી 6 દિવસમાં દર્દીની સ્થિતિમાં ઝડપી સુધારો જોવા મળ્યો હતો. હાલમાં દર્દીની સ્થિતિ સંપૂર્ણપણે સ્થિર હોવાથી તેને સામાન્ય વોર્ડમાં શિફ્ટ કરવામાં આવ્યો છે.

નિષ્ણાત તબીબોની ટીમનું ઉત્કૃષ્ટ ટીમવર્ક અને સેવાભાવના 

આ પડકારજનક ઓપરેશન ડો. નિયાતી લાખાણી (HOD) અને ડો. હિરેન પરમાર (HOU) ના માર્ગદર્શન હેઠળ પાર પાડવામાં આવ્યું હતું. આ સર્જરી ટીમમાં ડો. અભિજીત યાદવ (AP), ડો. રાહુલસિંઘ રાજપૂત (R3), ડો. પાર્થ વેકરિયા (R2), અને ડો. સ્મિત પટેલ (R1) જોડાયા હતા. જ્યારે એનેસ્થેસિયા ટીમમાં ડો. હીના ગડાણી (HOU), ડો. હર્ષિલ શાહ (AP), ડો. કૃપાલી (SR), ડો. શિવાંગી (SR), ડો. મીલી, ડો. ભાવિન (R2) અને ડો. રોશની (R1) એ મહત્વની ભૂમિકા ભજવી હતી.

જાહેર રજાના દિવસે પણ તબીબોની ત્વરિત નિર્ણયશક્તિ અને ઈમરજન્સી સેવાની કટિબદ્ધતાએ સરકારી હોસ્પિટલની અત્યાધુનિક તબીબી ક્ષમતાનું ઉત્તમ ઉદાહરણ પૂરું પાડ્યું છે.