જામનગર શહેરના અતિ સંવેદનશીલ એવા જામનગર એરપોર્ટ પર આજે સુરક્ષા એજન્સીઓ અને સ્થાનિક વહીવટી તંત્ર દ્વારા સંયુક્ત રીતે આતંકવાદ વિરોધી ‘મોકડ્રીલ’નું સફળ આયોજન કરવામાં આવ્યું હતું. આ વિશેષ કવાયત દ્વારા સંભવિત આતંકી હુમલા કે કટોકટી સામે તંત્રની સજ્જતા, ત્વરિત પ્રતિસાદ અને વિવિધ એજન્સીઓ વચ્ચેના સંકલનની સઘન ચકાસણી કરવામાં આવી હતી.
એરપોર્ટ પર 4 આતંકવાદીઓના હુમલાનો ડમી સિનારીયો
આ મોકડ્રીલ દરમિયાન જામનગર એરપોર્ટ પરિસરમાં 4 આતંકવાદીઓ ઘૂસી આવ્યા હોવાનો અને નાગરિકોને બાનમાં લીધા હોવાનો ડમી સિનારીયો ઊભો કરવામાં આવ્યો હતો. ઘટનાનો મેસેજ મળતાની સાથે જ ચેતક કમાન્ડો, પોલીસ તંત્ર અને ક્વિક રિસ્પોન્સ ટીમ ગણતરીની મિનિટોમાં જ ઘટનાસ્થળે પહોંચી ગઈ હતી અને સમગ્ર એરપોર્ટ વિસ્તારને કોર્ડન કરી લીધો હતો. સુરક્ષા જાળવવા માટે તાત્કાલિક બુલેટ પ્રુફ વાહનો, ફાયર ફાઇટર અને એમ્બ્યુલન્સ સહિતના અદ્યતન સાધનો પણ તૈનાત કરી દેવામાં આવ્યા હતા.
આતંકીઓની માંગ અને કમાન્ડોનું ઓપરેશન
ડમી આતંકવાદીઓએ બંધકોને મુક્ત કરવાના બદલામાં પોતાના દેશ જવા માટે પ્લેનની સુવિધા, જેલમાં બંધ તેમના 3 સાથીઓની મુક્તિ અને રોકડ રકમની માંગણી કરી હતી. જોકે, ચેતક કમાન્ડો અને સ્થાનિક પોલીસે કુશળતાપૂર્વક વ્યૂહાત્મક ઓપરેશન હાથ ધરીને આ તમામ 4 આતંકવાદીઓને સ્થળ પર જ ઠાર કર્યા હતા અને તમામ બંધકોને સુરક્ષિત રીતે બચાવી લીધા હતા.
ડોગ સ્ક્વોડે કારમાંથી ઝડપી વિસ્ફોટક સામગ્રી
સિનારીયો મુજબ, આતંકીઓ કારમાં આવ્યા હતા અને બોમ્બ ધડાકા કર્યા હતા. આતંકીઓની કારમાં બોમ્બ બનાવવાની સામગ્રી છુપાવેલી હતી. પરંતુ ઘટનાસ્થળે પહોંચેલી ડોગ સ્ક્વોડ અને બોમ્બ ડિસ્પોઝલ સ્ક્વોડે સઘન ચેકિંગ કરીને કારમાંથી આ વિસ્ફોટક સામગ્રી સમયસર શોધી કાઢી હતી.
ઉચ્ચ અધિકારીઓના માર્ગદર્શન હેઠળ શ્રેષ્ઠ સંકલન
આ સમગ્ર ઓપરેશન જિલ્લા કલેક્ટર પી. બી. પંડ્યા અને પોલીસ અધિક્ષક ડો. રવિ મોહન સૈનીના સીધા માર્ગદર્શન હેઠળ હાથ ધરાયું હતું. ઓપરેશન કમાન્ડર કીર્તિદેવસિંહ ઝાલા, ડીવાયએસપી જયવિરસિંહ ઝાલા, પી.આઈ. ચૌધરી સહિત પોલીસ, આરોગ્ય, ફાયર, PGVCL, સિવિલ ડિફેન્સ અને મરીન કમાન્ડો જેવી તમામ એજન્સીઓ વચ્ચે ઉત્કૃષ્ટ તાલમેલ જોવા મળ્યો હતો.
