ગુજરાત રાજ્ય સરકારે દિવ્યાંગ કર્મચારીઓના હિતમાં એક મોટો અને સકારાત્મક નિર્ણય લીધો છે. રાજ્ય સરકારે દિવ્યાંગ અધિકારીઓ અને કર્મચારીઓને નોકરીમાં બઢતી વખતે અનામતનો લાભ આપવા માટે એક યોગ્ય નીતિ ઘડવાના હેતુથી મુખ્યસચિવની અધ્યક્ષતામાં 5 સભ્યોની એક ઉચ્ચકક્ષાની સમિતિની રચના કરી છે.
અન્ય રાજ્યોની નીતિઓ અને કાનૂની જોગવાઈઓનો થશે અભ્યાસ
આ ઉચ્ચકક્ષાની સમિતિ દિવ્યાંગ કર્મચારીઓને બઢતીમાં અનામત આપવા માટે એક ચોક્કસ અને અસરકારક નીતિ તૈયાર કરશે. આ માટે સમિતિ દેશના અન્ય રાજ્યોમાં હાલ અમલમાં રહેલી નીતિઓ, વર્તમાન કાયદાકીય જોગવાઈઓ અને અદાલતો દ્વારા આપવામાં આવેલા વિવિધ ચુકાદાઓનો ઊંડાણપૂર્વક અભ્યાસ કરશે. આ તમામ પાસાઓ ચકાસ્યા બાદ બઢતીમાં અનામતની ટકાવારી કેટલી રાખવી અને તેના અમલ માટે કયા પગલાં લેવા, તે સહિતના મહત્વના મુદ્દાઓ નક્કી કરી સરકાર સમક્ષ પોતાની અંતિમ ભલામણો રજૂ કરશે.
સમિતિને વિશેષ સત્તાઓ અને નિશ્ચિત સમયમર્યાદા અપાઈ
નીતિ ઘડતરની પ્રક્રિયા પારદર્શક અને સર્વસમાવેશી બને તે માટે આ સમિતિને કેટલીક વિશેષ સત્તાઓ પણ આપવામાં આવી છે. સમિતિને જ્યારે પણ જરૂર જણાય ત્યારે તે રાજ્ય સરકારના કોઈપણ વિભાગ કે સરકારી કચેરી પાસેથી જરૂરી માહિતી, આંકડાઓ અને તેમના અભિપ્રાય મંગાવી શકશે. સત્તાવાર યાદીમાં સ્પષ્ટ જણાવવામાં આવ્યું છે કે, સમિતિની આ સમગ્ર કાર્યવાહી રાજ્ય સરકાર દ્વારા નિર્ધારિત કરવામાં આવેલી સમયમર્યાદા મુજબ જ આગળ વધશે અને પૂર્ણ કરવામાં આવશે.
સમિતિમાં સરકારના કયા ઉચ્ચ અધિકારીઓનો સમાવેશ ?
મુખ્યસચિવની અધ્યક્ષતામાં રચાયેલી આ 5 સભ્યોની સમિતિમાં સરકારના વિવિધ મહત્વના વિભાગોના અનુભવી અધિકારીઓને સામેલ કરવામાં આવ્યા છે. જેમાં સામાન્ય વહીવટ વિભાગ, સામાજિક ન્યાય અને અધિકારિતા વિભાગ તથા કાયદા વિભાગના ઉચ્ચ અધિકારીઓનો સમાવેશ થાય છે. આ ઉપરાંત, દિવ્યાંગ વ્યક્તિઓ માટેની કચેરીના કમિશનરને પણ આ સમિતિમાં સ્થાન આપવામાં આવ્યું છે, જેથી દિવ્યાંગોના વાસ્તવિક પ્રશ્નોને યોગ્ય રીતે સમજી શકાય.
