ગુજરાત સરકારે સંરક્ષણ દળોના જવાનો અને તેમના પરિવારો માટે એક અત્યંત મહત્વપૂર્ણ નિર્ણય લીધો છે. રાજ્ય સરકારે પંચાયત વેરાના નિયમોમાં ઐતિહાસિક સુધારો કરીને ગ્રામ પંચાયત વિસ્તારમાં આવેલા સૈનિકો, માજી સૈનિકો અને શહીદ જવાનોની વિધવાઓના 1 રહેણાંક મકાન પર મિલકત વેરામાંથી 100 ટકા મુક્તિ આપવાની સત્તાવાર જાહેરાત કરી છે.

નિયમોમાં સુધારો અને પાત્ર લાભાર્થીઓ 

રાજ્ય સરકાર દ્વારા ‘ગુજરાત ગ્રામ અને નગર પંચાયતોના કર અને ફી નિયમો, 1964’ તથા ‘ગુજરાત પંચાયત અધિનિયમ, 1993’ હેઠળ આ નવો સુધારો લાગુ કરવામાં આવ્યો છે. આ સુધારા મુજબ, સંરક્ષણ દળોના વર્તમાન કર્મચારીઓ અને તેમના જીવનસાથીઓ, માજી સૈનિકો તેમજ ફરજ દરમિયાન સર્વોચ્ચ બલિદાન આપનાર શહીદ સૈનિકોની વિધવાઓની માલિકીના અથવા કબજા હેઠળના 1 રહેણાંક મકાનને પ્રોપર્ટી ટેક્સમાંથી સંપૂર્ણ મુક્તિ મળશે. નોંધનીય છે કે, આ રાહત માત્ર ગ્રામ પંચાયતના અધિકારક્ષેત્રમાં આવતી રહેણાંક મિલકતોને જ લાગુ પડશે.

આર્થિક રાહત અને સૈનિકો પ્રત્યે સન્માન દર્શાવવાનો હેતુ 

સરકારના આ પગલાનો મુખ્ય ઉદ્દેશ્ય દેશની સરહદોની સુરક્ષા કરતા જવાનો અને દેશ ખાતર જાન ન્યોછાવર કરનારા શહીદોના પરિવારો પરનો કરવેરાનો આર્થિક બોજ ઘટાડવાનો છે. રાજ્ય સરકારે સ્પષ્ટ કર્યું છે કે, આ નિર્ણય શહીદો અને સૈનિકોના પરિવારો પ્રત્યે આદર, સન્માન અને કૃતજ્ઞતા વ્યક્ત કરવા માટે લેવાયો છે, જેનાથી તેમને સીધી આર્થિક રાહત પ્રાપ્ત થશે.

ડિસેમ્બર 2025 માં ડ્રાફ્ટ રજૂ કરાયા બાદ આખરી નિર્ણય 

આ કાયદાકીય ફેરફાર કરતા પહેલા રાજ્ય સરકારે ગત ડિસેમ્બર 2025 માં ગુજરાત સરકારના અસાધારણ ગેઝેટમાં સુધારા અંગેનો ડ્રાફ્ટ પ્રકાશિત કર્યો હતો. આ ડ્રાફ્ટ પર જાહેર જનતા પાસેથી વાંધા અને સૂચનો આમંત્રિત કરવામાં આવ્યા હતા. મળેલા તમામ વાંધાઓ અને સૂચનોની ઝીણવટભરી સમીક્ષા અને વિચારણા કર્યા બાદ, સરકારે હવે ‘ગુજરાત ગ્રામ અને નગર પંચાયતોના કર અને ફી (સુધારા) નિયમો, 2026’ તરીકે અંતિમ સુધારાઓ જાહેર કર્યા છે.

સરકારી સત્તાવાર ગેઝેટમાં આ સુધારેલા નિયમોના પ્રકાશનની તારીખથી જ આ ટેક્સ મુક્તિનો અમલ શરૂ થઈ જશે, જેથી લાભાર્થીઓને સત્વરે તેનો ફાયદો મળી શકશે.