બોટાદ જિલ્લાના રોજગાર ઇચ્છુક યુવાનોને સ્થાનિક કક્ષાએ અને અન્ય શહેરોમાં સરળતાથી રોજગારી મળી રહે તે હેતુથી જિલ્લા રોજગાર વિનિમય કચેરી દ્વારા આગામી 23 ઓગસ્ટ 2026 ના રોજ બોટાદ ખાતે એક વિશાળ ભરતીમેળાનું આયોજન કરવામાં આવ્યું છે. આ મેળામાં ખાનગી ક્ષેત્રની નામાંકિત કંપનીઓ વિવિધ જગ્યાઓ માટે યુવાનોની સીધી પસંદગી કરશે.

આ 6 પ્રતિષ્ઠિત કંપનીઓ ભરતીમાં લેશે ભાગ

રોજગાર વિનિમય કચેરીના સત્તાવાર નિવેદન મુજબ, આ રોજગાર મેળામાં રાજ્યની અને સ્થાનિક નામાંકિત કંપનીઓ ઉપસ્થિત રહેશે. જેમાં લાઠીદડની સ્કાય ટેક્ષટાઇલ્સ, વિઠ્ઠલાપુરની NTTF ટોયોટા કંપની, રાણપુરની ટેક્ષસ્પીન બેરીંગ્સ તથા RMP બેરીંગ્સ, ભદ્રાવડીની રામ સ્પીનીંગમીલ અને એલ.આઇ.સી. (LIC) બોટાદનો સમાવેશ થાય છે. આ કંપનીઓ દ્વારા પોતાની ખાલી જગ્યાઓ માટે યોગ્ય ઉમેદવારોની પસંદગી કરવામાં આવશે.

શૈક્ષણિક લાયકાત અને વયમર્યાદાના નિયમો

આ ભરતીમેળામાં ભાગ લેવા માટે ઉમેદવારની વયમર્યાદા 18 થી 40 વર્ષની વચ્ચે હોવી ફરજિયાત છે. શૈક્ષણિક લાયકાતની વાત કરીએ તો, લઘુત્તમ ધોરણ 10 પાસ, ધોરણ 12 પાસ, ગ્રેજ્યુએટ (સ્નાતક), આઇટીઆઇ (ITI) તેમજ કોઈપણ વિદ્યાશાખામાં ડિપ્લોમા પાસ કરેલા ઉમેદવારો આ ભરતી પ્રક્રિયામાં ભાગ લઈ પોતાની કારકિર્દી બનાવી શકશે.

અનુબંધમ પોર્ટલ પર નોંધણી અને સ્થળની વિગત

રોજગાર મેળામાં ભાગ લેવા ઇચ્છુક યુવાનોએ પોતાના તમામ શૈક્ષણિક લાયકાતના ઓરિજિનલ દસ્તાવેજો અને આધાર કાર્ડ સાથે 23 ઓગસ્ટ 2026 ના રોજ સવારે 9:00 કલાકે સરકારી હાઇસ્કૂલ, રેલવે સ્ટેશન રોડ, બોટાદ ખાતે રૂબરૂ ઉપસ્થિત રહેવાનું રહેશે. જોકે, તે પહેલાં ઉમેદવારોએ રાજ્ય સરકારના ‘અનુબંધમ’ વેબપોર્ટલ (anubandham.gujarat.gov.in) પર ‘જોબસીકર’ તરીકે પોતાનું ઓનલાઇન રજીસ્ટ્રેશન કરાવવું ફરજિયાત છે.

વધુ માર્ગદર્શન માટે કચેરીનો સંપર્ક કરવા અનુરોધ

પોર્ટલ પર નોંધણી થયા બાદ ઉમેદવારે લોગીન કરીને ‘જોબફેર’ (Job Fair) મેનુ પર ક્લિક કરી જરૂરી વિગતો ભરવાની રહેશે. આ પ્રક્રિયા પૂર્ણ કર્યા બાદ જ તેઓ ભરતીમેળામાં સત્તાવાર રીતે ભાગ લઈ શકશે. ફોર્મ ભરવા કે આ પ્રક્રિયા અંગે વધુ માહિતી તથા માર્ગદર્શન મેળવવા માટે ઉમેદવારો કચેરી સમય દરમિયાન બોટાદ રોજગાર વિનિમય કચેરીનો સંપર્ક કરી શકે છે.