কৃষিমন্ত্রী পীযুষ হাজৰিকাই আজি খুমটাইৰ বিধায়ক মৃণাল শইকীয়াৰ সৈতে গোলাঘাট জিলাৰ খুমটাই সমষ্টিৰ বিভিন্ন অঞ্চল পৰিদৰ্শন কৰে। কৃষি মন্ত্ৰীগৰাকীয়ে অঞ্চলটোৰ কৃষকসকলৰ সৈতে মত বিনিময় কৰি তেওঁলোকৰ সমস্যাৰ বুজ লয়।
মন্ত্ৰীগৰাকীয়ে কয়, যে কৃষকসকলৰ মূল সমস্যা জলসিঞ্চনৰ অভাৱ, উন্নত বাট-পথৰ অভাব আৰু শীতল ভঁৰালৰ প্ৰয়োজনীয়তাৰ জোৰা মৰাৰ বাবে ব্যৱস্থা গ্রহণ কৰা হ’ব।
মন্ত্ৰীগৰাকীয়ে কয়, যে মুখ্যমন্ত্রীয়ে কৃষিখণ্ডক অগ্রাধিকাৰ দি আহিছে আৰু পৰৱৰ্তী পাঁচ বছৰত ৰাজ্যখনত জলসিঞ্চন ব্যৱস্থাৰ উন্নয়নৰ বাবে ব্যাপক হাৰত কাম কৰা হ’ব। বিশেষকৈ নৱেম্বৰৰ পৰা এপ্ৰিললৈ কৃষকসকলে সম্মুখীন হোৱা পানীৰ সমস্যা দূৰ কৰিবলৈ জলসিঞ্চনৰ ব্যৱস্থা কৰা হ’ব বুলি তেওঁ কয়।
ধান খেতিৰ লগতে ৰবি শস্যৰ খেতিত অধিক মনোনিৱেশ কৰিবলৈ তেওঁ কৃষকসকলক আহ্বান জনায়। শ্রীহাজৰিকাই খুমটাইৰ ফলঙনি বোঁৱতী জলসিঞ্চন আঁচনিখন পৰিদৰ্শন কৰি পুনৰ এই আঁচনিখন কার্যক্ষম কৰা হ’ব বুলি প্রতিশ্রুতি দিয়ে।
উল্লেখযোগ্য যে, ১৯৬২ চনতে আৰম্ভ কৰা এই আঁচনিখন ৪০ বছৰ ধৰি অচল হৈ আছে। এই আঁচনিখন কার্যক্ষম হ’লে মৰঙী মৌজাৰ কমেও ১০০ খন গাঁৱৰ ৰাইজ উপকৃত হ’ব বুলি আশা কৰা হৈছে।
