રાજ્યમાં ચાંદીપુરા વાયરસના વધતા જતા પ્રકોપને પહોંચી વળવા કેન્દ્ર સરકારે મોટી કાર્યવાહી હાથ ધરી છે. રાજ્યમાં આ રોગચાળાને નાથવા અને વાયરસના પ્રસારને અટકાવવા માટે કેન્દ્ર સરકાર દ્વારા ખાસ ‘રાષ્ટ્રીય સંયુક્ત રોગચાળા કાર્યદળ’ તહેનાત કરવામાં આવ્યું છે. આ ઉચ્ચ સ્તરીય ટીમ વાયરસનું વૈજ્ઞાનિક વિશ્લેષણ કરી રાજ્ય સરકારને રોગચાળો ડામવામાં સીધી મદદ કરશે.

વાયરસના પ્રસારને સમજવા સઘન વૈજ્ઞાનિક તપાસ શરૂ

કેન્દ્રીય આરોગ્ય અને પરિવાર કલ્યાણ મંત્રાલયના નિર્દેશાનુસાર, દેશની મુખ્ય સંશોધન સંસ્થાઓ દ્વારા ચાંદીપુરા વાયરસ અંગે સતત અને ઊંડી વૈજ્ઞાનિક તપાસ શરૂ કરવામાં આવી છે. સંકલિત રોગ દેખરેખ કાર્યક્રમ હેઠળ આ વિશેષ કાર્યદળને રાજ્યમાં તહેનાત કરાયું છે. આ તપાસનો પ્રાથમિક ઉદ્દેશ્ય વાયરસના ઉદ્ભવ અને તેના ઝડપી પ્રસારના ચોક્કસ કારણોને સમજવાનો છે.

ટાસ્ક ફોર્સમાં 3 મોટી રાષ્ટ્રીય સંસ્થાઓનો સમાવેશ

આરોગ્ય મંત્રાલયે આપેલી સત્તાવાર વિગતો મુજબ, આ રાષ્ટ્રીય કાર્યદળમાં દેશની અગ્રણી સંસ્થાઓના નિષ્ણાતોનો સમાવેશ કરવામાં આવ્યો છે. જેમાં રાષ્ટ્રીય રોગ નિયંત્રણ કેન્દ્ર, ભારતીય તબીબી સંશોધન પરિષદ તથા પશુપાલન અને ડેરી વિભાગ સામેલ છે. આ તમામ એજન્સીઓ એકસાથે મળીને ગ્રાઉન્ડ ઝીરો પર કામગીરી કરશે.

રાજ્ય સરકારના આરોગ્ય વિભાગને મળશે સીધી મદદ

આ કેન્દ્રીય દળ માત્ર તપાસ પૂરતું સીમિત નહીં રહે, પરંતુ રોગચાળાની તપાસ, પરિસ્થિતિનું મૂલ્યાંકન, સચોટ સારવારની પદ્ધતિઓ, પ્રયોગશાળાઓ વચ્ચેનું સંકલન અને જાહેર આરોગ્ય નિવારણની અમલવારીમાં રાજ્ય સરકારને સક્રિય સહકાર આપશે. વધુમાં, પાયાના સ્તર પર ચાલી રહેલી કામગીરીની સમીક્ષા કરી, આ ટીમ રાજ્ય આરોગ્ય વિભાગ સાથે મળીને સીધી મંત્રાલયને યોગ્ય પગલાં લેવા માટે ભલામણો કરશે.