পঞ্চায়ত আৰু গ্ৰামোন্নয়ন, পৰ্যটন আদি বিভাগৰ মন্ত্ৰী ৰণজিৎ কুমাৰ দাসে আজি বঙাইগাওঁৰ কাকৈজানা সংৰক্ষিত বনাঞ্চল পৰিদৰ্শন কৰে। এই বনাঞ্চলখনত বিগত বছৰত ৯ টা আৰু চলিত বছৰত ৭ টা সোণালী বান্দৰ দুৰ্ঘটনাগ্ৰস্থ হৈ মৃত্যু হোৱা বিষয়টো লৈ মন্ত্ৰী শ্ৰীদাসে দুখ প্ৰকাশ কৰে৷ প্ৰায় ৪০০ সোণালী বান্দৰ থকা বঙাইগাওঁ জিলাৰ কদমতলা আৰু ৰাভাপাৰা অঞ্চলৰ ৰাইজে এই বান্দৰৰ সংৰক্ষণ আৰু সুৰক্ষাৰ বাবে যথেষ্ট কষ্ট কৰিছে বুলি উল্লেখ কৰি মন্ত্ৰীগৰাকীয়ে ইয়াৰ বাবে কিছু নতুনত্ব অনাৰ বিষয়ে ভবাৰ থল আছে বুলি কয়। তেওঁ লগতে কয়, যে সোণালী বান্দৰবোৰ কাকৈজানা গাওঁৰ পৰা পাহাৰ অভিমুখে পঠিয়াব পাৰিলে এই জীৱকুল ৰক্ষা পৰিব। এই পৰিদৰ্শনকালত মন্ত্ৰীগৰাকীৰ লগত জিলা আয়ুক্ত নৱদীপ পাঠককে ধৰি কেইবাগৰাকী ব্যক্তি উপস্থিত আছিল।