কেন্দ্ৰীয় গৃহ মন্ত্ৰালয়ৰ যুটীয়া সচিব (দুর্যোগ ব্যৱস্থাপনা) এম. ৰামচন্দ্ৰডুৰ নেতৃত্বত অহা আন্তঃমন্ত্রণালয় কেন্দ্ৰীয় দলটোৱে আজি যোৰহাট জিলাৰ বিভিন্ন বান প্ৰভাৱিত অঞ্চল পৰিদৰ্শন কৰে৷ দলটোৱে প্ৰথমে টীয়ক ৰাজহ চক্ৰৰ অধীনস্থ বনাই জগদুৱাৰ অঞ্চলৰ বানত ক্ষতিগ্ৰস্ত পথ সমূহ আৰু ধনতোলা অঞ্চলৰ জাঁজী নদীৰ মথাউৰিৰ ছিগা অংশসমূহ পৰিদৰ্শন কৰি শেহতীয়া বান পৰিস্থিতিৰ বুজ লয়।
ইয়াৰ পাছতে জিলাখনৰ যোৰহাট পশ্চিম ৰাজহ চক্ৰৰ দ-গায়ন গাঁৱৰ লগতে শ’লমৰাকে ধৰি কেইবাটাও বানপীড়িত অঞ্চলত উপস্থিত হৈ খহনীয়া আৰু ক্ষতিগ্ৰস্ত পথ সমূহ পৰিদৰ্শন কৰে। পৰিদৰ্শনকালত কেন্দ্ৰীয় দলটোৱে জিলাখনৰ বানে কৰা ক্ষয়-ক্ষতিৰ বুজ লয় আৰু সবিশেষ বুজিবলৈ বিভাগীয় মুৰব্বীসকলৰ সৈতে বিস্তৃত আলোচনাত মিলিত হয়। জিলা প্রশাসন তথা সংশ্লিষ্ট বিভাগসমূহৰ বিষয়া- কর্মচাৰীসকলে দুৰ্যোগৰ সময়ত দেখুওৱা নিষ্ঠা আৰু অক্লান্ত পৰিশ্ৰমক দলটোৱে প্ৰশংসা কৰে ৷ লগতে বানত হোৱা ক্ষয়-ক্ষতিসমূহ শীঘ্ৰেই পুনৰ মেৰামতিৰ কাম আৰম্ভ কৰিবলৈ বিষয়াসকলক উৎসাহ যোগায়।
