গ্লাছগত অনুষ্ঠিত কমনৱেলথ ক্রীড়া প্রতিযোগিতাৰ দশম দিনা কালি ১৬টা পদক জয়েৰে ভাৰত চতুৰ্থ স্থানলৈ উন্নীত হৈছে। ভাৰতে এতিয়ালৈকে ১৩টা সোণ, ১৭টা ৰূপ আৰু ৯টা ব্ৰঞ্জসহ মুঠ ৩৯টা পদক লাভ কৰিছে। ভাৰতে কমনৱেলথ গেমছৰ বক্সিং শিতানত সর্বোৎকৃষ্ট প্রদৰ্শনেৰে অভিলেখ সংখ্যক ৭টা সোণ আৰু তিনিটা ৰূপৰ পদক অৰ্জন কৰি পদক তালিকাৰ শীৰ্ষ স্থানত আছে।
অংকুশ পংঘলে ইংলেণ্ডৰ ডিমেজি চিটুক পুৰুষৰ ৮০ কিলোগ্রাম শাখাৰ ফাইনেলত ৪-১ ব্যৱধানত আৰু শচীন ছিৱাছে নামিবিয়াৰ ত্ৰিয়াগেইন মর্নিং এণ্ড ডেভেলক ৬০ কিলোগ্রাম ওজন শাখাত ৩-২ ব্যৱধানত পৰাস্ত কৰি সোণৰ পদক অৰ্জন কৰে। বক্সিঙত সোণৰ পদক অৰ্জন কৰা আন খেলুৱৈসকল হ’ল জেচমিন লাম্বোৰিয়া, সাক্ষী চৌধাৰী, প্ৰিয়া ঘংঘাচ, প্ৰীতি পাৱাৰ আৰু অৰুন্ধতী চৌধাৰী৷
ইপিনে, আন ৩ গৰাকী বক্সাৰ নৰেন্দ্ৰৰ ৱেৰৱাল, লাভলীনা বৰগোহাঁই আৰু যদুমণি সিঙে ৰূপৰ পদক অৰ্জন কৰে। দীর্ঘ দূৰত্বৰ দৌৰবিদ গুলবীৰ সিঙে ১০ মিটাৰত ৰূপৰ পদক লাভ কৰা পাছত ৫ হাজাৰ মিটাৰ দৌৰতো ব্ৰঞ্জৰ পদক অৰ্জন কৰি কমনৱেলথ গেমছত ইতিহাস ৰচনা কৰে। তেওঁ কমনৱেলথ গেমছৰ ৫ হাজাৰ মিটাৰ দৌৰত প্ৰথমগৰাকী পদক জয়ী ভাৰতীয় হোৱাৰ গৌৰৱ অৰ্জন কৰাৰ লগতে একেখনে প্রতিযোগিতাতে দুটা পদক অর্জন কৰা প্ৰথমগৰাকী ভাৰতীয় ট্রেক এণ্ড ফিল্ড খেলুৱৈ হিচাপে পৰিগণিত হয়। এছিয়ান চেম্পিয়নগৰাকীয়ে ১৩ মিনিট ২৪ দশমিক ৫ ছেকেণ্ডত এই দুয়োটা প্রতিযোগিতা সম্পূৰ্ণ কৰে।
ইপিনে, পেৰা এথলেটিক্সত ভাৰতৰ সুমন ৰানাই পুৰুষৰ F-57 শ্বটপুত শিতানত সোণৰ পদক হস্তগত কৰাৰ বিপৰীতে শুভম জুৱেলে ৰূপৰ পদক অৰ্জন কৰে। জুডো মেটত উন্নতি শৰ্মাই মহিলাৰ ৬৩ কিলোগ্রাম শাখাত ব্ৰঞ্জৰ পদক লাভ কৰে।
