জাপানৰ আইচি-নাগ’য়াত অনুষ্ঠিত এছিয়ান পেৰা গেমছত ভাৰতীয় খেলুৱৈসকলৰ উন্নত প্ৰদৰ্শনৰ ধাৰা অব্যাহত আছে। ভাৰতে বৰ্তমানলৈকে প্ৰতিযোগিতাত ১৪ টা সোণ, ২১ টা ৰূপ আৰু ২৪ টা ব্ৰঞ্জসহ মুঠ ৫৯ টা পদকেৰে তালিকাৰ চতুৰ্থ স্থানত আছে।
ভাৰতৰ দিলীপ গাৱিতে আজি টি- 46 – টি-47 যুটীয়া শিতানৰ পুৰুষৰ ১০০ মিটাৰত সোণৰ পদক অৰ্জন কৰে। সতীৰ্থ খেলুৱৈ মহম্মদ মৰচিংগা নাকাথে এই শিতানত ৰূপৰ পদক হস্তগত কৰে।
ইপিনে, পুৰুষৰ শ্বটপুট এফ-ফৰটি ছিক্স শিতানত আজি শচীন ছাৰ্জেৰাও খিলাড়ীয়ে সোণৰ পদক, মহম্মদ য়াচিৰে ৰূপৰ পদক আৰু পাৰভীনে ব্ৰঞ্জৰ পদক লাভ কৰিছে। প্ৰবীণ কুমাৰে পুৰুষৰ হাইজাম্পৰ টি-ফটি ফৰ- ছিক্সটি ফৰ শিতানত সোণৰ পদক জয়েৰে অভিলেখ গঢ়িছে।
একেটা শিতানতে বন্তিয়ে ৰূপৰ পদক জয় কৰে। পুৰুষৰ শ্বটপুট এফ-ফিফটি থ্রী শিতানত ভাৰতৰ আয়ুষ বার্মাই আজি সোণৰ পদক জয় কৰে। একেদৰে সিমৰণে টি টুৱেলভ শিতানৰ মহিলাৰ এশ মিটাৰ দৌৰত দেশৰ হকে দ্বিতীয়টো সোণৰ পদক লাভ কৰে। খেলুৱৈগৰাকীয়ে ইয়াৰ পূৰ্বে কালি ২০০ মিটাৰ দৌৰত নতুন অভিলেখ গঢ়ি সোণৰ পদক অৰ্জন কৰিছিল।
