শ্বিলঙত যোৱা ১৯ আগষ্টত সংঘটিত হিংসাত্মক ঘটনাক কেন্দ্ৰ কৰি অসম আৰু মেঘালয়ৰ পৰ্যটক টেক্সি সংস্থাৰ মাজত সৃষ্টি হোৱা অচলাৱস্থাৰ চূড়ান্ত অৱসানৰ পথ প্ৰশস্ত হৈছে। শ্বিলঙত কালি পৰিবহণ বিভাগৰ দায়িত্বত থকা মেঘালয়ৰ উপ-মুখ্যমন্ত্ৰী এছ ধৰ আৰু অসমৰ সীমান্ত সুৰক্ষা আৰু উন্নয়ন মন্ত্ৰী অতুল বৰাৰ সহ-অধ্যক্ষতাত দুয়োখন ৰাজ্যৰ টেক্সী চালক সংস্থাৰ অংশগ্রহণেৰে অনুষ্ঠিত বৈঠকত সর্বসন্মতভাবে এই সংঘাতৰ অন্ত ঘোষণা কৰা হয়। আলোচনাৰ সিদ্ধান্তমৰ্মে পূৰ্বৰ দৰেই অসমৰ টেক্সি শ্বিলঙকে ধৰি মেঘালয়ত চলাচল কৰিব। মেঘালয়ৰ টেক্সি চালকসকলে বিচৰা ধৰণে বৰঝাৰ বিমান বন্দৰত পার্কিং আৰু অন্য সুবিধা লাভ কৰিব। বৈঠকত গাড়ী তালাচীৰ সময়ত হোৱা হাৰাশাস্তি দূৰ কৰাৰ বাবে দুয়ো ৰাজ্যৰ আৰক্ষীক নিৰ্দেশ দিয়া হয়। বৈঠকৰ অন্তত পৰিবহণ মন্ত্ৰী অতুল বৰাই কয়, যে ২৩ আগষ্টত গুৱাহাটীত অনুষ্ঠিত বৈঠকৰ সিদ্ধান্তমর্মে কালি তেওঁলোক আলোচনাত মিলিত হয়। পৰিস্থিতি এতিয়া স্বাভাৱিক বুলিও তেওঁ মন্তব্য কৰে।