বাংলাদেশৰ অন্তৱৰ্তী চৰকাৰৰ মুখ্য উপদেষ্টা মহম্মদ ইউনিছে দেশখনত বাস কৰা হিন্দু আৰু সংখ্যালঘু সম্প্ৰদায়ৰ সকলো লোকৰ সুৰক্ষা আৰু নিৰাপত্তাৰ আশ্বাস প্ৰদান কৰিছে। উপদেষ্টাগৰাকীয়ে আজি প্ৰধানমন্ত্ৰী নৰেন্দ্ৰ মোদীৰ সৈতে টেলিফোনযোগে কথা পাতে আৰু বাংলাদেশৰ সাম্প্ৰতিক স্থিতিৰ বিষয়ে মত বিনিময় কৰে। আলোচনাকালত শ্ৰী মোদীয়ে গণতান্ত্রিক, সুস্থিৰ, শান্তিপূৰ্ণ আৰু প্ৰগতিশীল বাংলাদেশৰ প্ৰতি ভাৰতৰ সমৰ্থনৰ কথা দোহাৰে। তেওঁ বিভিন্ন উন্নয়নমূলক উদ্যমৰ জৰিয়তে বাংলাদেশৰ জনসাধাৰণক সহায় কৰাৰ বাবে ভাৰতৰ প্ৰতিশ্ৰুতিবদ্ধতা প্রকাশ কৰে। শ্ৰী মোদীয়ে লগতে দেশখনত বাস কৰা হিন্দু আৰু অন্য সকলো সংখ্যালঘু সম্প্ৰদায়ৰ সুৰক্ষা আৰু নিৰাপত্তা সুনিশ্চিত কৰাত গুৰুত্ব আৰোপ কৰে। তেওঁলোকে নিজ নিজ ৰাষ্ট্ৰৰ অগ্ৰাধিকাৰ অনুসৰি দুয়োখন দেশৰ মাজৰ দ্বিপাক্ষিক সম্পর্ক আগুৱাই নিয়াৰ বিভিন্ন উপায় সম্পর্কেও আলোচনা কৰে।