સુરેન્દ્રનગરના રતનપર વિસ્તારમાં કાયદાના રક્ષક એવા એક પોલીસ કોન્સ્ટેબલના ઘરમાંથી જ ચાલતા ગેરકાયદેસર શેરબજારના જુગારના મોટા કારસ્તાનનો આર.આર. સેલ દ્વારા પર્દાફાશ કરવામાં આવ્યો છે. પોલીસે ઓચિંતા દરોડા પાડીને 10 લેપટોપ અને 29 મોબાઈલ ફોન સહિત લાખો રૂપિયાનો મુદ્દામાલ જપ્ત કરીને 5 આરોપીઓની અટકાયત કરી છે.

પોલીસ જવાનના ઘરમાં જ ચાલતો હતો ગેરકાયદેસર વેપાર

અમારા પ્રતિનિધિના જણાવ્યા અનુસાર, સુરેન્દ્રનગર જિલ્લાના ધજાળા પોલીસ સ્ટેશનમાં પોલીસ કોન્સ્ટેબલ તરીકે ફરજ બજાવતા સંજયસિંહ નાથુભા રાઠોડના રહેણાંક મકાનમાં આ ગેરકાયદેસર પ્રવૃત્તિ ચાલતી હતી. સંજયસિંહ રતનપર ખાતે આવેલી રામેશ્વર ટાઉનશીપના મકાન નંબર 51 માં રહે છે. પોતાના જ ઘરમાં તેઓ શેરબજારના ગેરકાયદે સોદાના આધારે હારજીતનો મોટો જુગાર રમાડતા હોવાની ચોક્કસ બાતમી આર.આર. સેલને મળી હતી. જેના આધારે ટીમે મકાન પર ઓચિંતો દરોડો પાડીને આ કૌભાંડનો પર્દાફાશ કર્યો હતો.

ઇલેક્ટ્રોનિક ઉપકરણો સહિત 3,07,000 નો મુદ્દામાલ જપ્ત

આર.આર. સેલની ટીમે પાડેલા આ દરોડામાં સ્થળ પરથી મોટા પ્રમાણમાં ટેકનિકલ સાધનો મળી આવ્યા છે. પોલીસે હાઈ-ટેક જુગારધામ ચલાવવા માટે ઉપયોગમાં લેવાતા 10 લેપટોપ, 29 મોબાઈલ ફોન અને જુગારના સોદાના હિસાબો લખેલી નોટબુક સહિત કુલ 3,07,000 રૂપિયાનો મુદ્દામાલ જપ્ત કર્યો છે. પોલીસ કર્મચારીના ઘરમાંથી જ આટલા મોટા પાયે જુગાર રમાડવાના સાધનો પકડાતા સ્થાનિક સ્તરે અને પોલીસ બેડામાં ભારે ચકચાર મચી જવા પામી છે.

કુલ 23 શખ્સો સામે ગુનો દાખલ, વધુ તપાસ શરૂ
પોલીસે આ સ્થળ પરથી 5 શંકાસ્પદ વ્યક્તિઓની તાત્કાલિક અટકાયત કરી લીધી છે. આ સાથે જ આ સમગ્ર ગેરકાયદેસર નેટવર્ક સાથે સીધી કે આડકતરી રીતે જોડાયેલા અન્ય લોકો મળીને કુલ 23 શખ્સો સામે સત્તાવાર રીતે ગુનો નોંધવામાં આવ્યો છે. એક પોલીસ કર્મચારી ખુદ આવા ગોરખધંધામાં સંડોવાયેલો હોવાથી ઉચ્ચ અધિકારીઓએ આ મામલાની અત્યંત ગંભીર નોંધ લીધી છે.