સુરેન્દ્રનગર જિલ્લાના લીંબડી તાલુકાના જાંબુ ગામમાં કોઈપણ પ્રકારની મેડિકલ ડિગ્રી કે સર્ટિફિકેટ વિના ગેરકાયદેસર રીતે એલોપેથીક દવાઓ આપી લોકોના સ્વાસ્થ્ય સાથે ગંભીર ચેડાં કરતા એક બોગસ ડોક્ટરને સ્પેશિયલ ઓપરેશન ગ્રુપની ટીમે રંગેહાથ ઝડપી પાડ્યો છે. પોલીસે તેની પાસેથી 16,388 રૂપિયાની દવાઓ જપ્ત કરી કાયદેસરની કાર્યવાહી હાથ ધરી છે.
SOG ટીમને મળેલી સચોટ બાતમીના આધારે દરોડો
ગ્રામ્ય વિસ્તારોમાં ભોળા લોકોના આરોગ્ય સાથે ચેડાં કરતા બોગસ તબીબો સામે સુરેન્દ્રનગર પોલીસ દ્વારા સતત વોચ રાખવામાં આવી રહી છે. દરમિયાન, સુરેન્દ્રનગર એસ.ઓ.જી.ની ટીમને ચોક્કસ બાતમી મળી હતી કે લીંબડી તાલુકાના જાંબુ ગામમાં એક શખ્સ કોઈપણ જાતની માન્ય તબીબી ડિગ્રી કે મેડિકલ કાઉન્સિલના રજિસ્ટ્રેશન વિના ગેરકાયદેસર રીતે પ્રેક્ટિસ કરી રહ્યો છે. આ શખ્સ દર્દીઓને તપાસીને સીધી એલોપેથી સારવાર આપી રહ્યો હોવાની પાકી માહિતી મળતાં, SOG ની ટીમે તાત્કાલિક જાંબુ ગામમાં પહોંચીને છાપો માર્યો હતો.
16,388 રૂપિયાની એલોપેથી દવાઓના જથ્થા સાથે આરોપીની ધરપકડ
દરોડાની આ કાર્યવાહી દરમિયાન પોલીસે ક્લિનિક ચલાવતા તુષારરોય ભક્તા રોય નામના શખ્સને ઝડપી પાડ્યો હતો. પોલીસ દ્વારા તેની ઉલટતપાસ કરી મેડિકલ પ્રેક્ટિસ કરવા માટેની માન્ય ડિગ્રી કે સર્ટિફિકેટ માંગવામાં આવતા તે કોઈ પણ સરકારી આધાર રજૂ કરી શક્યો ન હતો. આથી, તે બોગસ ડોક્ટર હોવાનું સ્પષ્ટ થતાં પોલીસે સ્થળ પરથી 16,388 રૂપિયાની કિંમતની વિવિધ એલોપેથીક દવાઓ, દવાઓનો જથ્થો અને અન્ય મેડિકલ સાધનો કબજે કર્યા હતા.
પોલીસ દ્વારા ગુનો દાખલ કરી સઘન તપાસ શરૂ
કોઈપણ વૈજ્ઞાનિક જ્ઞાન કે માન્યતા વિના દર્દીઓના જીવને સીધા જોખમમાં મૂકતા આ બોગસ ડોક્ટરની અટકાયત બાદ પોલીસે મેડિકલ પ્રેક્ટિશનર એક્ટ હેઠળ ગુનો નોંધવાની તજવીજ હાથ ધરી છે. આરોપી તુષારરોય ભક્તા રોય છેલ્લા કેટલા સમયથી આ ગામમાં પોતાની બોગસ પ્રેક્ટિસ ચલાવતો હતો, તેણે અત્યાર સુધીમાં કેટલા દર્દીઓને સારવાર આપી છે અને આ જથ્થાબંધ એલોપેથીક દવાઓ તે ક્યાંથી ખરીદતો હતો, તે તમામ દિશામાં પોલીસ દ્વારા વધુ તપાસ અને સઘન પૂછપરછ શરૂ કરવામાં આવી છે.
