સુરત શહેરના પાંડેસરા વિસ્તારમાં જાહેર રસ્તા પર ભવ્ય રીતે જન્મદિવસની ઉજવણી કરવી એક યુવકને ભારે પડી છે. પોલીસ કમિશનરના જાહેરનામાનો ભંગ કરી રસ્તા પર કેક કાપી ફટાકડા ફોડવાનો વીડિયો સોશિયલ મીડિયામાં વાયરલ થતાં જ પોલીસે તાત્કાલિક કાર્યવાહી હાથ ધરી હતી. પોલીસે યુવકને પોલીસ સ્ટેશને બોલાવી કાયદાનું ભાન કરાવ્યું હતું, જે બાદ યુવકે જાહેરમાં પોતાની ભૂલ સ્વીકારી માફી માંગી હતી.
કાળી કારમાં એન્ટ્રી અને રસ્તા વચ્ચે કાપી અનેક કેક
પ્રાપ્ત વિગતો અનુસાર, સુરતના પાંડેસરા વિસ્તારમાં એક યુવકે પોતાના જન્મદિવસની ઉજવણી માટે જાહેર માર્ગ પર જમાવડો કર્યો હતો. સોશિયલ મીડિયા પર વાયરલ થયેલા વીડિયોમાં સ્પષ્ટ જોઈ શકાતું હતું કે, આ યુવક એક કાળી કારમાં સ્ટાઇલિશ એન્ટ્રી કરે છે. તેણે શરીરે સોનાના દાગીના પહેરેલા હતા અને પોતાના મિત્રો સાથે મળીને જાહેર રસ્તા પર એકસાથે અનેક કેક કાપી હતી. આ ઉપરાંત, રસ્તા પર જ ફટાકડા ફોડીને ઉજવણી કરવામાં આવી હતી.
વીડિયો વાયરલ થતાં જ પાંડેસરા પોલીસ હરકતમાં
સુરત શહેરમાં કાયદો અને વ્યવસ્થા જાળવવા માટે જાહેર સ્થળોએ આ પ્રકારના કાર્યક્રમો અને ઉજવણીઓ પર પોલીસ દ્વારા પ્રતિબંધ મૂકવામાં આવ્યો છે. આમ છતાં, આ નિયમોનો ખુલ્લેઆમ ભંગ થતો હોવાનો વીડિયો વાયરલ થતાં જ પાંડેસરા પોલીસ એક્શનમાં આવી હતી. પોલીસે તાત્કાલિક તપાસ કરી વીડિયોમાં દેખાતા યુવકની ઓળખ કરી હતી અને તેને પોલીસ સ્ટેશને બોલાવ્યો હતો. પોલીસે તેની સામે જાહેરનામાના ભંગ બદલ કાયદેસરની કાર્યવાહી હાથ ધરીને તેને કાયદાનું કડક ભાન કરાવ્યું હતું.
યુવકે ભૂલ સ્વીકારી, અન્ય યુવાનોને પણ કરી અપીલ
પોલીસની કડક કાર્યવાહીનો સામનો કર્યા બાદ યુવકને પોતાની ભૂલનું ભાન થયું હતું. તેણે પોલીસ સમક્ષ પોતાનો ગુનો કબૂલ્યો હતો અને જાહેરમાં માફી માંગી હતી. યુવકે સ્વીકાર્યું હતું કે, જાહેર રસ્તા પર કેક કાપવી અને ફટાકડા ફોડવા એ કાયદાની વિરુદ્ધ છે. સાથે જ તેણે અન્ય યુવાનોને પણ અપીલ કરી હતી કે તેઓ આવી ભૂલ ન કરે અને કાયદાનું પાલન કરે.
