ગુજરાત રાજ્યમાં છેલ્લા કેટલાક દિવસોથી વરસાદે વિરામ લીધો છે, ત્યારે હવામાન વિભાગ દ્વારા નવી આગાહી જાહેર કરવામાં આવી છે. હવામાન વિભાગના જણાવ્યા અનુસાર, આગામી 7 દિવસ સુધી રાજ્યમાં ભારે વરસાદની કોઈ જ શક્યતા નથી. માત્ર દક્ષિણ ગુજરાત અને સૌરાષ્ટ્રના કેટલાક વિસ્તારોમાં જ હળવાથી મધ્યમ વરસાદ વરસી શકે છે.

છેલ્લા 24 કલાકમાં માત્ર દક્ષિણ ગુજરાત અને સૌરાષ્ટ્રમાં સામાન્ય વરસાદ

હવામાન વિભાગના વૈજ્ઞાનિક અભિમન્યુ ચૌહાણના જણાવ્યા મુજબ, રાજ્યમાં છેલ્લા 24 કલાક દરમિયાન વરસાદનું પ્રમાણ ખૂબ જ નહિવત્ રહ્યું છે. માત્ર દક્ષિણ ગુજરાત અને સૌરાષ્ટ્રના કેટલાક છૂટાછવાયા સ્થળોએ જ હળવાથી મધ્યમ વરસાદ નોંધાયો છે. જ્યારે રાજ્યના બાકીના તમામ ભાગોમાં વાતાવરણ સંપૂર્ણપણે સૂકું જોવા મળ્યું છે.

અમદાવાદ અને ગાંધીનગરમાં તાપમાન 34 ડિગ્રીને પાર 

વરસાદ ખેંચાવાના કારણે તાપમાનમાં પણ આંશિક વધારો જોવા મળ્યો છે. છેલ્લા 24 કલાકમાં અમદાવાદ શહેરમાં મહત્તમ તાપમાન 34.3 ડિગ્રી સેલ્સિયસ અને પાટનગર ગાંધીનગરમાં 34 ડિગ્રી સેલ્સિયસ નોંધાયું છે. આ બંને શહેરોમાં છેલ્લા 24 કલાક દરમિયાન બિલકુલ વરસાદ નોંધાયો નથી. હવામાન વિભાગના અનુમાન મુજબ, આવનારા અઠવાડિયામાં પણ રાજ્યના તાપમાનમાં કોઈ મોટો કે નોંધપાત્ર ફેરફાર જોવા મળશે નહીં.

આગામી 7 દિવસની આગાહી અને વરસાદની ઘટ 

હવામાન વિભાગની સત્તાવાર આગાહી મુજબ, આવનારા એક અઠવાડિયા દરમિયાન હવામાન મોટાભાગે યથાવત રહેશે અને વરસાદનું પ્રમાણ ખૂબ જ ઓછું રહેશે. આગામી 7 દિવસ સુધી મુખ્યત્વે દક્ષિણ ગુજરાત અને સૌરાષ્ટ્રના જ કેટલાક વિસ્તારોમાં હળવાથી મધ્યમ વરસાદી ઝાપટાં પડવાની શક્યતા છે. રાજ્યમાં અન્યત્ર ક્યાંય પણ ભારે વરસાદની હાલ કોઈ જ સંભાવના જણાતી નથી. અત્રે નોંધનીય છે કે, રાજ્યમાં અત્યાર સુધીમાં સરેરાશ નોંધાતા વરસાદ કરતા 7% ઓછો વરસાદ નોંધાયો છે.

લાંબા સમયથી વરસાદ ખેંચાતા અને રાજ્યમાં 7% વરસાદની ઘટ નોંધાતા ખેડૂતોમાં પોતાના ઊભા પાકને લઈને ચિંતા જોવા મળી રહી છે.