રાજકોટ જિલ્લાના ધોરાજી તાલુકાના સુપેડી રેલવે સ્ટેશન ખાતે ગ્રામજનોની લાંબા સમયની માંગણી સંતોષાઈ છે. કેન્દ્રીય મંત્રી મનસુખ માંડવિયાએ આજે સુપેડી ખાતે પોરબંદર-ભાવનગર અને રાજકોટ-પોરબંદર ટ્રેનોના નવા સ્ટોપેજને લીલી ઝંડી આપીને પ્રસ્થાન કરાવ્યું હતું. આ સુવિધાથી વિદ્યાર્થીઓ અને નોકરિયાત વર્ગને દૈનિક મુસાફરીમાં મોટો ફાયદો થશે.

ગ્રામજનોની માંગણી સ્વીકારાઈ: મુસાફરી બનશે સરળ અને સસ્તી

કેન્દ્રીય શ્રમ, રોજગાર અને રમતગમત મંત્રી મનસુખ માંડવિયાએ સુપેડી ખાતે ટ્રેનોને લીલી ઝંડી આપીને નવા સ્ટોપેજનો પ્રારંભ કરાવ્યો હતો. આ પ્રસંગે તેમણે જણાવ્યું હતું કે, સુપેડીના ગ્રામજનોની માંગણીને ધ્યાનમાં રાખીને સરકારે આ વધારાના સ્ટોપેજને મંજૂરી આપી છે. ટ્રેનની મુસાફરી સસ્તી અને સમયસર હોવાથી શિક્ષણ અર્થે જતા વિદ્યાર્થીઓ, રોજિંદા નોકરિયાતો અને વેપારીઓ માટે આ સુવિધા અત્યંત ઉપયોગી સાબિત થશે. તેમણે વધુમાં ઉમેર્યું હતું કે, ટ્રેન વ્યવહારથી સમય અને નાણાંની બચત થવાની સાથે મુસાફરોને ટ્રાફિક અને અકસ્માતોની સમસ્યામાંથી પણ મોટી રાહત મળશે.

જનસુવિધા વધારવા સરકાર કટિબદ્ધ: કઈ ટ્રેનોને મળ્યું સ્ટોપેજ ?

મંત્રીએ વિશેષમાં જણાવ્યું હતું કે, પ્રધાનમંત્રી નરેન્દ્ર મોદીના નેતૃત્વમાં સરકાર રેલવે કનેક્ટિવિટી થકી જનસુવિધા અને જનસુખાકારી વધારવા માટે કટિબદ્ધ છે. રેલવેના વાણિજ્ય પ્રબંધક અતુલ કુમાર ત્રિપાઠીએ માહિતી આપતા જણાવ્યું હતું કે, પ્રાયોગિક ધોરણે 2 ટ્રેનોને સુપેડી સ્ટેશન પર સ્ટોપેજ અપાયું છે. જેમાં ટ્રેન નંબર 19571/19572 રાજકોટ-પોરબંદર દૈનિક એક્સપ્રેસ અને ટ્રેન નંબર 59557/59560 પોરબંદર-ભાવનગર પેસેન્જરનો સમાવેશ થાય છે. આ પ્રસંગે ભાવનગર મંડળના ડીઆરએમ દિનેશ વર્મા સહિતના રેલવે અધિકારીઓ અને નિકુંજ કણસાગરા તથા રવિ માકડીયા જેવા સ્થાનિક અગ્રણીઓ ઉપસ્થિત રહ્યા હતા.

સુપેડી સ્ટેશન પર ટ્રેનોના આગમન અને પ્રસ્થાનનો સમય

નવા સ્ટોપેજની વ્યવસ્થા મુજબ, ટ્રેન નંબર 59557 પોરબંદર-ભાવનગર પેસેન્જર સવારે 09:09 કલાકે આવીને 09:10 કલાકે ઉપડશે. જ્યારે ટ્રેન નંબર 59560 ભાવનગર-પોરબંદર પેસેન્જર સાંજે 19:32 કલાકે આવશે અને 19:33 કલાકે પ્રસ્થાન કરશે. તેવી જ રીતે ટ્રેન નંબર 19571 રાજકોટ-પોરબંદર દૈનિક એક્સપ્રેસ સવારે 09:25 કલાકે આવશે અને 09:26 કલાકે રવાના થશે. પરત ફરતી વખતે 19572 પોરબંદર-રાજકોટ એક્સપ્રેસ સાંજે 18:12 કલાકે આવી 18:13 કલાકે પ્રસ્થાન કરશે.

સાજડીયાળી ગામે રામચંદ્ર મંદિરના મહોત્સવમાં આપી હાજરી

સુપેડી ખાતે રેલવેના કાર્યક્રમ બાદ કેન્દ્રીય મંત્રી મનસુખ માંડવિયા સાજડીયાળી ગામે નવનિર્મિત રામચંદ્ર ભગવાનના મંદિરના ત્રિદિવસીય મૂર્તિ પ્રાણ-પ્રતિષ્ઠા મહોત્સવમાં પણ સહભાગી થયા હતા. વૈષ્ણવાચાર્ય શરદકુમાર બાવાની પાવન ઉપસ્થિતિમાં આ મહોત્સવનો શુભારંભ કરવામાં આવ્યો હતો. આ ધાર્મિક પ્રસંગે સ્થાનિક ધારાસભ્ય જયેશ રાદડિયા અને પૂર્વ સાંસદ રમેશ ધડુક સહિતના રાજકીય આગેવાનો પણ વિશેષરૂપે જોડાયા હતા.