પ્રધાનમંત્રી નરેન્દ્ર મોદી આજે નવી દિલ્હીમાં ભારત મંડપમ ખાતે ભારત રિન્યુએબલ એનર્જી શિખર સંમેલન અને એક્સ્પો 2026નું ઉદ્ઘાટન કરશે. આ પ્રસંગે તેઓ ઉપસ્થિત જનમેદનીને સંબોધન પણ કરશે.
આ ચાર દિવસીય શિખર સંમેલન આ મહિનાની પાંચમી તારીખ સુધી ચાલશે. આ શિખર સંમેલનની થીમ ‘ઇન્વેસ્ટ ઇનોવેટ ઇન્સ્પાયર “છે.
ભારત રિન્યુએબલ એનર્જી શિખર સંમેલન અને એક્સ્પો 2026 નીતિ ઘડવૈયાઓ, રોકાણકારો, નાણાકીય સંસ્થાઓ અને ઉદ્યોગ અગ્રણીઓ સાથે 40 થી વધુ મંત્રીઓ સહિત 130 થી વધુ દેશોના સહભાગીઓને આકર્ષશે.
તે સ્વચ્છ ઊર્જા રોકાણ, ઉદ્યોગ જોડાણ અને તકનીકી ભાગીદારી માટે વૈશ્વિક મંચ તરીકે કામ કરશે. આ શિખર સંમેલનમાં દેશ ભાગીદારો તરીકે ઓસ્ટ્રેલિયા, ડેનમાર્ક, યુરોપિયન યુનિયન, ફ્રાન્સ, જર્મની, નેધરલેન્ડ, નોર્વે, સ્વીડન અને યુનાઇટેડ કિંગડમની ભાગીદારી જોવા મળી રહી છે.
આ શિખર સંમેલન આંતરરાષ્ટ્રીય સૌર ગઠબંધન સભાના નવમા સત્ર અને હરિત હાઇડ્રોજન પરની ચોથી આંતરરાષ્ટ્રીય પરિષદની સાથે યોજાઈ રહ્યું છે.
આ શિખર સંમેલન રોકાણ, ભાગીદારી અને પ્રોજેક્ટ વિકાસને પ્રોત્સાહન આપવા માટે પૂર્ણ સત્રો, મંત્રીસ્તરીય ચર્ચાઓ અને સરકાર-થી-સરકાર જોડાણોનું પણ આયોજન કરશે.
દરમિયાન, આ પ્રદર્શનમાં 400 થી વધુ પ્રદર્શકો પ્રદર્શિત થશે, જેઓ સૌર અને પવન ઊર્જા, હરિત હાઇડ્રોજન, ઊર્જા સંગ્રહ અને અન્ય ઉભરતા ક્ષેત્રોમાં અદ્યતન તકનીકો, ભારતીય ઉત્પાદન ક્ષમતાઓ અને સ્વચ્છ ઊર્જા ઉકેલો પ્રદર્શિત કરશે.
