ભારતના પ્રધાનમંત્રી નરેન્દ્ર મોદીએ નવી દિલ્હીમાં આયોજિત 18મા બ્રિક્સ સમિટ દરમિયાન ઇથોપિયાના પ્રધાનમંત્રી ડૉ. અબી અહેમદ અલી સાથે મહત્વપૂર્ણ દ્વિપક્ષીય વાટાઘાટો કર્યો હતો. આ બેઠકનો મુખ્ય ઉદ્દેશ્ય બંને દેશો વચ્ચેની વ્યૂહાત્મક ભાગીદારીને વધુ મજબૂત બનાવવાનો હતો. આ ઉપરાંત, પ્રધાનમંત્રીએ મલેશિયન સમકક્ષ સાથે પણ ચર્ચા કરી હતી અને આજે ચીનના રાષ્ટ્રપતિ સાથે પણ તેમની મુલાકાત નિર્ધારિત છે.
આર્થિક અને સંરક્ષણ ભાગીદારીની વિસ્તૃત સમીક્ષા
વિદેશ મંત્રાલય દ્વારા જાહેર કરવામાં આવેલા સત્તાવાર નિવેદન અનુસાર, બંને નેતાઓએ આર્થિક સહયોગ, સંરક્ષણ અને સુરક્ષા ભાગીદારી તેમજ ક્ષમતા નિર્માણ જેવા ચાવીરૂપ ક્ષેત્રોમાં અત્યાર સુધી થયેલી પ્રગતિની સમીક્ષા કરી હતી. ડિસેમ્બર 2025 માં પ્રધાનમંત્રી મોદીની આદીસ અબાબાની ઐતિહાસિક મુલાકાત બાદ બંને દેશોના સંબંધોમાં આવેલી મજબૂતાઈને આ બેઠક વધુ આગળ ધપાવશે. બંને નેતાઓએ પરસ્પર હિતના પ્રાદેશિક અને આંતરરાષ્ટ્રીય મુદ્દાઓ પર પોતાના દ્રષ્ટિકોણનું આદાન-પ્રદાન કર્યું હતું અને બહુપક્ષીય મંચ પર સાથે મળીને કામ કરવાની પ્રતિબદ્ધતાને પુનઃપુષ્ટિ કરી હતી.
ગ્લોબલ સાઉથના અવાજને મળશે બળ
આ બેઠક દરમિયાન, પ્રધાનમંત્રી મોદીએ 18મા બ્રિક્સ સમિટમાં ઇથોપિયાની સક્રિય ભાગીદારી બદલ વિશેષ પ્રશંસા વ્યક્ત કરી હતી. તેમણે નોંધ્યું હતું કે ઇથોપિયાની આ ઉપસ્થિતિથી ‘ગ્લોબલ સાઉથ’ ના દેશોના સામૂહિક અવાજને વૈશ્વિક સ્તરે વધુ મજબૂત બનાવવામાં મોટી મદદ મળી રહી છે.
મલેશિયા અને ચીનના નેતાઓ સાથે પણ મુલાકાત
ભારતની અધ્યક્ષતામાં યોજાઈ રહેલા આ મહત્વપૂર્ણ બ્રિક્સ સમિટ દરમિયાન, પ્રધાનમંત્રી મોદીએ તેમના મલેશિયન સમકક્ષ અનવર ઇબ્રાહિમ સાથે પણ દ્વિપક્ષીય વાટાઘાટો કરી હતી. વધુમાં, આજના દિવસના અંતે પ્રધાનમંત્રી મોદી ચીનના રાષ્ટ્રપતિ શી જિનપિંગ સાથે પણ અત્યંત અગત્યની દ્વિપક્ષીય ચર્ચા કરવાના છે, જેના પર સમગ્ર વિશ્વની નજર મંડાયેલી છે.
