મોરબી જિલ્લામાં તાજેતરમાં પડેલા ભારે વરસાદને પગલે સર્જાયેલી જળબંબાકારની સ્થિતિમાં નદીના ધસમસતા પાણીના વેણમાં તણાઈ જવાથી 3 લોકોના મોત નીપજ્યા હતા. આ દુઃખદ ઘટનાને કારણે રાજ્ય સરકાર દ્વારા મૃતકોના પરિવારજનોને સાંત્વના આપવાની સાથે, સહાય અન્વયે પ્રત્યેક પરિવારને રૂપિયા 4 લાખની આર્થિક સહાયના ચેક અર્પણ કરવામાં આવ્યા છે.

માળિયા અને વાંકાનેર તાલુકાના મૃતકોના પરિવારોને સાંત્વના

ભારે વરસાદ દરમિયાન માળિયા તાલુકાના ઘાંટીલા ગામે નદીના પાણીમાં તણાઈ જવાથી ગેલાભાઈ નોંધાભાઇ હાડગરાનું અવસાન થયું હતું. બીજી તરફ, વાંકાનેર તાલુકાના કોટડા નાયણી ગામે ડેમી નદીના પૂરમાં સિરાજભાઈ ખમીશાભાઇ સંધી અને તેમના માત્ર 7 વર્ષના માસૂમ પુત્ર કાસિબનું પણ ડૂબી જવાથી કરૂણ મૃત્યુ થયું હતું. આ બંને શોકગ્રસ્ત પરિવારજનોની રાજ્યમંત્રી કાંતિભાઈ અમૃતિયાએ રૂબરૂ મુલાકાત લીધી હતી અને તેમને રાજ્ય સરકાર તરફથી આપવામાં આવેલ રૂપિયા 4-4 લાખની સહાયના ચેક અર્પણ કર્યા હતા.

મહાનુભાવોની ઉપસ્થિતિમાં મૃતકોને શ્રદ્ધાંજલિ

સહાય વિતરણના આ કાર્યક્રમમાં રાજ્યમંત્રી કાંતિભાઈ અમૃતિયાની સાથે સ્થાનિક ધારાસભ્ય જીતુભાઈ સોમાણી પણ ઉપસ્થિત રહ્યા હતા. આ ઉપરાંત જિલ્લા કલેક્ટર સ્વપ્નિલ ખરે, નિવાસી અધિક કલેક્ટર એસ.જે. ખાચર, નાયબ જિલ્લા વિકાસ અધિકારી શૈલેષચંદ્ર ભટ્ટ, ડિઝાસ્ટર મામલતદાર અલ્પેશ પરમાર તેમજ જિલ્લા પંચાયત કારોબારી સમિતિના ચેરમેન મનીષ કાંજીયા સહિતના ઉચ્ચ અધિકારીઓ અને પદાધિકારીઓએ વિશેષ હાજરી આપી હતી. તમામ ઉપસ્થિત મહાનુભાવોએ દિવંગતોના આત્માની શાંતિ અર્થે બે મિનિટનું મૌન પાળીને ભાવભીની શ્રદ્ધાંજલિ અર્પણ કરી હતી.