મહીસાગર જિલ્લાના સંતરામપુર તાલુકાના આંબા ગામ ખાતે રાજ્યના મંત્રી કૌશિક વેકરીયાએ નવનિર્મિત 66KV જેટકો સબ સ્ટેશનનું વિધિવત લોકાર્પણ કર્યું હતું. રૂપિયા 12.66 કરોડના ખર્ચે તૈયાર થયેલા આ અદ્યતન એનર્જી ટ્રાન્સમિશન પ્રોજેક્ટથી સ્થાનિક આદિજાતિ વિસ્તારના હજારો નાગરિકો અને ખેડૂતોને હવે ગુણવત્તાયુક્ત અને અવિરત વીજ પુરવઠો પ્રાપ્ત થશે.
22 ગામના 5000 થી વધુ ગ્રાહકોને મળશે સીધો ફાયદો
નવું 66KV સબ સ્ટેશન કાર્યરત થવાથી સંતરામપુર તાલુકાના આસપાસના 22 જેટલા ગામોના લોકોને મોટી રાહત મળશે. લાંબા સમયથી વીજળીની સમસ્યાનો સામનો કરતા આ ગામોના 5000 થી વધુ ગ્રાહકોને હવે આ સબ સ્ટેશનના માધ્યમથી 24 કલાક અવિરત વીજળી મળી રહેશે. પૂરતા વોલ્ટેજ સાથે વીજળી મળવાથી વિદ્યાર્થીઓના અભ્યાસથી લઈને સ્થાનિક રોજિંદા કામકાજોમાં સુગમતા આવશે.
20 કિલોમીટરના વિસ્તારમાં આદિજાતિ વિકાસને મળશે વેગ
આશરે રૂપિયા 12.66 કરોડના જંગી ખર્ચે તૈયાર થયેલું આ અદ્યતન એનર્જી ટ્રાન્સમિશન સબ સ્ટેશન આંબા ગામથી 20 કિલોમીટરની ત્રિજ્યામાં આવેલા વિસ્તારોને આવરી લેશે. મહીસાગર જિલ્લાના આ આદિજાતિ વિસ્તારમાં વીજ વિતરણ વ્યવસ્થા વધુ મજબૂત બનવાથી સ્થાનિક ખેતી અને સિંચાઈ વ્યવસ્થાને મોટો ફાયદો થશે.
