મહારાષ્ટ્રના નાંદેડ નજીક નાગપુર-રાયપુર હાઇવે પર સર્જાયેલા એક ગોઝારા માર્ગ અકસ્માતમાં 9 લોકોના કમકમાટીભર્યા મોત નિપજ્યા છે, જ્યારે અન્ય 9 લોકો ગંભીર રીતે ઘાયલ થયા છે. પ્રધાનમંત્રી નરેન્દ્ર મોદી સહિત દેશના ટોચના નેતાઓએ આ દુર્ઘટના પર ઘેરો શોક વ્યક્ત કર્યો છે અને કેન્દ્ર સરકાર દ્વારા પીડિતો માટે તાત્કાલિક આર્થિક સહાયની જાહેરાત કરવામાં આવી છે.
ટ્રક અને બોલેરો વચ્ચે સર્જાયો જીવલેણ અકસ્માત
પ્રાપ્ત પ્રાથમિક માહિતી અનુસાર, આજે સવારે મહારાષ્ટ્રના ભંડારા જિલ્લા નજીક નાંદેડમાં નાગપુર-રાયપુર હાઇવે પર એક પૂરપાટ ઝડપે આવતી ટ્રક અને બોલેરો કાર વચ્ચે ધડાકાભેર ટક્કર થઈ હતી. આ ભયાનક અકસ્માતમાં 9 લોકોએ ઘટનાસ્થળે જ પોતાના જીવ ગુમાવ્યા હતા, જ્યારે અન્ય 9 મુસાફરોને ગંભીર ઈજાઓ પહોંચતા તેમને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યા છે.
PM મોદીએ 2 લાખ રૂપિયાની આર્થિક સહાય જાહેર કરી
પ્રધાનમંત્રી નરેન્દ્ર મોદીએ શુક્રવારે આ દુર્ઘટનામાં થયેલી જાનહાનિ પર ઊંડો શોક વ્યક્ત કર્યો હતો. તેમણે મૃતકોના પરિવારજનો અને ઘાયલો માટે પ્રધાનમંત્રી રાષ્ટ્રીય રાહત ભંડોળ (PMNRF) માંથી આર્થિક સહાયની જાહેરાત કરી છે. જે અંતર્ગત અકસ્માતમાં જીવ ગુમાવનાર પ્રત્યેક મૃતકના સગા-સંબંધીઓને 2 લાખ રૂપિયા અને ઘાયલ થયેલા લોકોને 50,000 રૂપિયાની આર્થિક મદદ આપવામાં આવશે.
દુઃખની ઘડીમાં પરિવારો સાથે મારી સંવેદના: પ્રધાનમંત્રી
પ્રધાનમંત્રી કાર્યાલય દ્વારા સોશિયલ મીડિયા પ્લેટફોર્મ ‘એક્સ’ પર પ્રધાનમંત્રીનો શોક સંદેશ પોસ્ટ કરવામાં આવ્યો હતો. જેમાં જણાવાયું હતું કે, “મહારાષ્ટ્રના નાંદેડમાં થયેલા અકસ્માતમાં થયેલા જાનહાનિથી હું દુઃખી છું. આ દુઃખની ઘડીમાં શોકગ્રસ્ત પરિવારો સાથે મારી સંવેદના છે. હું ઘાયલોના ઝડપી સ્વસ્થ થવા માટે પ્રાર્થના કરું છું.”
ઉપરાષ્ટ્રપતિ અને લોકસભા અધ્યક્ષે પણ શોક વ્યક્ત કર્યો
પ્રધાનમંત્રી ઉપરાંત દેશના ઉપરાષ્ટ્રપતિ સી.પી. રાધાકૃષ્ણને પણ આ અકસ્માતની ઘટના પર દુઃખની લાગણી વ્યક્ત કરી હતી. તેમણે શોકગ્રસ્ત પરિવારો પ્રત્યે હૃદયપૂર્વક સંવેદના પાઠવી ઘાયલોના ઝડપી સ્વાસ્થ્ય લાભ માટે પ્રાર્થના કરી હતી. લોકસભાના અધ્યક્ષ ઓમ બિરલાએ પણ મૃતકોના પરિવારો પ્રત્યે સંવેદના વ્યક્ત કરતા પીડિતોને આ આઘાત સહન કરવાની શક્તિ મળે તેવી કામના કરી હતી.
