મધ્યપ્રદેશના ભિંડ જિલ્લામાં એક અત્યંત ગમખ્વાર માર્ગ અકસ્માત સર્જાયો છે. ગ્વાલિયર-ભિંડ-ઇટાવા હાઇવે-719 પર મોડી રાત્રે એક પિકઅપ વાન અને ટ્રક વચ્ચે થયેલી ભયંકર ટક્કરમાં 8 મજૂરોના કરૂણ મોત નીપજ્યા છે, જ્યારે 23 લોકો ગંભીર રીતે ઘાયલ થયા છે. આ તમામ મજૂરો કામ પતાવીને પોતાના વતન પરત ફરી રહ્યા હતા ત્યારે રસ્તામાં જ કાળનો કોળિયો બન્યા હતા.
વતન પરત ફરતી વખતે હાઇવે પર ત્રાટક્યો કાળ
પ્રાપ્ત વિગતો અનુસાર, આ તમામ શ્રમિકો મધ્યપ્રદેશના ભિંડ જિલ્લાના ગોહાડ વિસ્તારમાં મજૂરી કામ કરતા હતા. ગઈકાલે મોડી રાત્રે તેઓ એક પિકઅપ વાનમાં સવાર થઈને પોતાના વતન ઉત્તર પ્રદેશના લખીમપુર ખેરી સ્થિત ઘરે જઈ રહ્યા હતા. આ મુસાફરી દરમિયાન ગ્વાલિયર-ભિંડ-ઇટાવા હાઇવે-719 પર એક ટ્રક સાથે તેમની પિકઅપ વાનની ધડાકાભેર ટક્કર થઈ હતી.
5 લોકોના ઘટનાસ્થળે જ મોત, અન્ય 3 ના સારવાર દરમિયાન પ્રાણ પંખેરું ઉડ્યા
ટક્કર એટલી ભયંકર હતી કે અકસ્માત સર્જાતા જ હાઇવે પર મજૂરોની ચીચીયારીઓ ગુંજી ઉઠી હતી. આ ગમખ્વાર અકસ્માતમાં 5 મજૂરોના ઘટનાસ્થળે જ કમકમાટીભર્યા મોત નીપજ્યા હતા. અન્ય ઈજાગ્રસ્તોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા હતા. ગંભીર રીતે ઘાયલ કેટલાક મજૂરોને વધુ સારવાર અર્થે ગ્વાલિયર લઈ જવામાં આવી રહ્યા હતા, તે દરમિયાન રસ્તામાં જ વધુ 3 શ્રમિકોએ દમ તોડ્યો હતો. આમ, આ ગોઝારી હોનારતમાં કુલ 8 લોકોએ પોતાના જીવ ગુમાવ્યા છે, જ્યારે અન્ય 23 લોકો હજુ પણ ઘાયલ અવસ્થામાં સારવાર હેઠળ છે.
પોલીસ દ્વારા ગુનો નોંધી અકસ્માતના કારણોની તપાસ શરૂ
અકસ્માતની જાણ થતાં જ સ્થાનિક પોલીસ કાફલો તાબડતોબ ઘટનાસ્થળે દોડી ગયો હતો. પોલીસે બચાવ કામગીરી હાથ ધરીને મૃતદેહોને પોસ્ટમોર્ટમ માટે મોકલી આપ્યા હતા અને ઘાયલોને હોસ્પિટલ પહોંચાડવાની વ્યવસ્થા કરી હતી. હાલમાં પોલીસે આ સમગ્ર ઘટના અંગે ગુનો નોંધીને કાયદેસરની કાર્યવાહી હાથ ધરી છે. આ જીવલેણ અકસ્માત કયા સંજોગોમાં સર્જાયો અને તેમાં કોની બેદરકારી હતી, તે દિશામાં પોલીસ દ્વારા તપાસ શરૂ કરવામાં આવી છે.
