જામનગરના રણમલ તળાવમાં એકસાથે 11 કાચબાના શંકાસ્પદ મોત નીપજતા પર્યાવરણપ્રેમીઓ અને સ્થાનિકોમાં ચકચાર મચી જવા પામી છે. દૂષિત પાણીના કારણે આ જળચર જીવોના મોત થયા હોવાની પ્રાથમિક આશંકા સેવાઈ રહી છે, તંત્રએ તપાસના ચક્રો ગતિમાન કર્યા છે.
તળાવની પાળ પાસેથી મોટી સંખ્યામાં મૃત કાચબા મળી આવ્યા
અમારા પ્રતિનિધિના જણાવ્યા અનુસાર જામનગરના પ્રખ્યાત રણમલ તળાવની પાળ વિસ્તારમાં અચાનક મોટી સંખ્યામાં કાચબા મૃત હાલતમાં જોવા મળ્યા હતા. આસપાસ ફરવા આવેલા લોકો અને સ્થાનિકોની નજર પડતા આ સમગ્ર મામલો પ્રકાશમાં આવ્યો હતો. એકસાથે 11 જેટલા નિર્દોષ જળચર જીવોના મોતને લઈને લોકોમાં ભારે અરેરાટી અને દુઃખની લાગણી જોવા મળી રહી છે.
મહાનગરપાલિકા અને GPCB ની ટીમ એક્શનમાં
આ ગંભીર ઘટનાની જાણ જામનગર મહાનગરપાલિકાને થતાં જ તંત્રની ટીમ તાત્કાલિક ઘટનાસ્થળે દોડી ગઈ હતી અને મૃત કાચબાઓનો કબજો લઈ પ્રાથમિક કાર્યવાહી હાથ ધરી હતી. પાણીમાં રહેલા કોઈ ઝેરી તત્વ કે પ્રદૂષણના કારણે આ મોત થયા હોવાની શક્યતાને પગલે મહાનગરપાલિકા દ્વારા તાકીદે ગુજરાત પ્રદૂષણ નિયંત્રણ બોર્ડના અધિકારીઓને પણ આ અંગે જાણ કરવામાં આવી હતી.
પાણીના સેમ્પલ વધુ તપાસ માટે ગાંધીનગર મોકલાયા
ઘટનાની ગંભીરતાને ધ્યાનમાં લઈને GPCBના અધિકારીઓ દ્વારા લાખોટા લેકના પાણીના અલગ-અલગ સેમ્પલ લેવામાં આવ્યા છે. તળાવના પાણીમાં કયા પ્રકારનું અને કેટલા પ્રમાણમાં પ્રદૂષણ રહેલું છે, અને ખરેખર તેના કારણે જ કાચબાઓએ જીવ ગુમાવ્યો છે કે કેમ, તે તમામ બાબતોની સઘન અને વૈજ્ઞાનિક તપાસ માટે આ સેમ્પલ ગાંધીનગર સ્થિત લેબોરેટરીમાં મોકલી આપવામાં આવ્યા છે.
લેબોરેટરી રિપોર્ટ બાદ જ વાસ્તવિક કારણ બહાર આવશે
હવે ગાંધીનગરથી લેબોરેટરી તપાસનો સત્તાવાર રિપોર્ટ આવ્યા બાદ જ લાખોટા લેકના પાણીમાં પ્રદૂષણનું ચોક્કસ કારણ અને કાચબાઓના મોત પાછળનું વાસ્તવિક સત્ય સામે આવી શકશે. હાલ પૂરતું આ ઘટનાને પગલે શહેરના પર્યાવરણ અને જીવદયા પ્રેમીઓમાં ભારે ચિંતાનો માહોલ જોવા મળી રહ્યો છે.
