ભારતીય સેનાના ઉપપ્રમુખ, લેફ્ટનન્ટ જનરલ રાહુલ આર. સિંહે કહ્યું, યુદ્ધની બદલતી પ્રકૃતિએ સશસ્ત્ર દળો માટે ઉભરતી ટેક્નોલૉજીને ઝડપથી અપનાવવા અને સંકલન કરવાને અનિવાર્ય બનાવી દીધું છે. નવી દિલ્હીમાં આજે સર્વેલન્સ અને ઇલેક્ટ્રો-ઑપ્ટિક્સ પર ભારતીય સૈન્ય સમીક્ષાને સંબોધતા તેમણે કહ્યું, ખાસ કરીને વર્ષ 2020 પછી યુદ્ધમાં તીવ્ર અને વ્યાપક પરિવર્તન આવ્યું છે. ડિજિટલ સંચાર, ઇલેક્ટ્રૉનિક યુદ્ધ, સાયબર ઑપરેશન તથા નેટવર્ક અને ક્લાઉડ આધારિત પરિસ્થિતિ-ગત જાગૃતિ આધુનિક સૈન્ય અભિયાનોના મહત્વના ઘટક બનીને ઉભર્યા છે.

શ્રી સિંહે કહ્યું, સર્વેલન્સ એક બહુસ્તરીય માળખામાં વિકસિત થયું છે. તેમાં અવકાશ આધારિત મિલકતો, હવાઈ મંચ, માનવરહિત હવાઈ વાહનો, સંકેતો અને માનવ બુદ્ધિમત્તા તથા દરિયાઈ પ્રણાલિઓ સામેલ છે. તેમણે ડ્રૉન ક્રાન્તિને વર્ષ 2020 પછીથી યુદ્ધમાં થયેલા સૌથી મહત્વના વિકાસ પૈકીની એક ગણાવી.

લેફ્ટનન્ટ જનરલ સિંહે એ વાત પર ભાર આપ્યો કે, પડકાર માત્ર ડ્રૉનનું સંચાલન કરવાનો નહીં, પરંતુ તેને એક વ્યાપક કાર્યરત્ પ્રણાલિના ભાગરૂપે અસરકારક રીતે સંકલિત અને સંચાલિત કરવાનો છે.
ઉદ્ઘાટન સત્રને સંબોધતા વાયુસેનાના ઉપપ્રમુખ ઍરમાર્શલ તેજપાલ સિંહે જમીન, સમુદ્ર, વાયુ, અવકાશ અને સાયબર ક્ષેત્રોમાં કાર્યકારી શ્રેષ્ઠતા મેળવવા માટે એક સંકલિત અને નેટવર્ક કેન્દ્રીત દ્રષ્ટિકોણની જરૂરિયાત પર ભાર આપ્યો. તેમણે કહ્યું, સર્વેલન્સ, સલામત સંચાર અને અસરકારક નિર્ણય લેવાની પ્રક્રિયા એક સંકલિત પ્રણાલિ તરીકે કામ કરવી જોઈએ. ઍરમાર્શલ તેજપાલ સિંહે કાર્યકારી પડકારને સ્પષ્ટ રીતે ઓળખવા અને યુદ્ધ ક્ષમતાને મજબૂત કરવા ઉદ્યોગ તથા શિક્ષણ જગતની સાથે મજબૂત સહકારને પ્રોત્સાહન આપવાનો આગ્રહ કર્યો.