હવામાન વિભાગ દ્વારા ગુજરાતમાં વરસાદનો વધુ એક રાઉન્ડ શરૂ થવાની શક્યતા વચ્ચે આગામી 7 દિવસ માટે ભારેથી અતિભારે વરસાદની આગાહી કરવામાં આવી છે. રાજ્યમાં એકસાથે 5 અલગ-અલગ હવામાન પ્રણાલીઓ સક્રિય થવાને કારણે ચોમાસી માહોલ અત્યંત તીવ્ર બન્યો છે. આજે સમગ્ર રાજ્યમાં વ્યાપક વરસાદની સંભાવના વચ્ચે અમદાવાદ, સુરત અને નર્મદા સહિતના 7 જિલ્લાઓમાં તંત્ર દ્વારા રેડ એલર્ટ જાહેર કરવામાં આવ્યું છે.
5 હવામાન પ્રણાલીઓ સક્રિય, ડિપ્રેશન પશ્ચિમ તરફ આગળ વધ્યું
હવામાન વિભાગના વૈજ્ઞાનિક રામાશ્રય યાદવના જણાવ્યા અનુસાર, હાલમાં સક્રિય ડીપ ડિપ્રેશનની તીવ્રતા ઘટીને તે ડિપ્રેશનમાં પરિવર્તિત થયું છે અને પશ્ચિમ-ઉત્તર પશ્ચિમ દિશામાં આગળ વધી રહ્યું છે. આગામી થોડા સમયમાં આ સિસ્ટમ વધુ નબળી પડીને ‘વેલમાર્ક લો-પ્રેશર’ વિસ્તારમાં ફેરવાઈ જશે. હાલમાં રાજ્યમાં ડિપ્રેશન, ઓફ શોર ટ્રફ, વેસ્ટર્ન ડિસ્ટર્બન્સ, શીયર ઝોન અને મોન્સૂન ટ્રફ એમ એકસાથે 5 અલગ-અલગ હવામાન સિસ્ટમ્સ સક્રિય છે. જેના પરિણામે સમગ્ર ગુજરાતમાં ગાજવીજ અને વીજળીના કડાકા-ભડાકા સાથે મુસળધાર વરસાદ પડવાની પૂરેપૂરી શક્યતા છે.
સુરત-નર્મદા સહિત 7 જિલ્લામાં અતિભારે વરસાદની ચેતવણી
વરસાદની તીવ્રતા અંગે વિગતો આપતા હવામાન વિભાગે જણાવ્યું છે કે, આજે ખાસ કરીને નર્મદા અને સુરત જિલ્લામાં અસામાન્ય ભારે વરસાદ પડી શકે છે. આ ઉપરાંત ભાવનગર, બોટાદ, અમદાવાદ, આણંદ અને ખેડા જિલ્લામાં પણ અત્યંત ભારે વરસાદની આશંકાને પગલે રેડ અલર્ટ જારી કરવામાં આવ્યું છે. સંભવિત પૂર અને જળબંબાકારની સ્થિતિને પહોંચી વળવા માટે આ તમામ જિલ્લાના વહીવટી તંત્રને સાબદા કરી દેવાયા છે.
માછીમારોને 3 દિવસ દરિયો ન ખેડવા આદેશ
હવામાનમાં આવેલા આ મોટા પલટાને કારણે દરિયાકાંઠાના વિસ્તારોમાં પણ તેજ પવન ફૂંકાવાની અને દરિયામાં ઊંચા મોજાં ઉછળવાની શક્યતા રહેલી છે. આ સ્થિતિને ધ્યાનમાં રાખીને હવામાન વિભાગ દ્વારા આગામી 3 દિવસ સુધી માછીમારોને દરિયો ન ખેડવા માટે કડક સૂચના આપવામાં આવી છે. નાગરિકોને પણ વરસાદ અને વીજળીના કડાકા દરમિયાન જરૂરી સાવચેતી રાખવા અને સલામત સ્થળે રહેવા અપીલ કરવામાં આવી છે.