ભાઈ-બહેનના પવિત્ર પ્રેમનું પ્રતીક એવા રક્ષાબંધનના તહેવારને લઈને ગુજરાત રાજ્ય માર્ગ વાહન વ્યવહાર નિગમ દ્વારા મુસાફરો માટે ખાસ આયોજન કરવામાં આવ્યું છે. તહેવારના દિવસોમાં મુસાફરોના ભારે ધસારાને પહોંચી વળવા અને બહેનો સરળતાથી પોતાના ભાઈના ઘરે પહોંચી શકે તે હેતુથી નિગમ દ્વારા રાજ્યભરમાં 6500 જેટલી એક્સ્ટ્રા બસ ટ્રીપ દોડાવવાનો મહત્વપૂર્ણ નિર્ણય લેવામાં આવ્યો છે.
નાયબ મુખ્યમંત્રીના માર્ગદર્શન હેઠળ 26 થી 30 ઓગસ્ટ સુધી વિશેષ સંચાલન
દર વર્ષની જેમ ચાલુ વર્ષ 2026 માં પણ રક્ષાબંધનના તહેવાર નિમિત્તે એસટી વિભાગ દ્વારા વાહનવ્યવહારની સુચારુ વ્યવસ્થા ગોઠવવામાં આવી છે. આગામી 26 ઓગસ્ટથી 30 ઓગસ્ટ દરમિયાન આ વિશેષ એક્સ્ટ્રા ટ્રીપનું સંચાલન કરવામાં આવશે. આ પાંચ દિવસો દરમિયાન ડેપોની નિયમિત બસો ઉપરાંત વધારાની બસો દોડાવીને મુસાફરોને સુરક્ષિત અને ઝડપી પરિવહન સેવા પૂરી પાડવામાં આવશે.
રાજ્યના મુખ્ય શહેરો અને તીર્થધામોને સાંકળતા રૂટ પર દોડશે બસો
GSRTC દ્વારા જાહેર કરવામાં આવેલી વિગતો અનુસાર, આ એક્સ્ટ્રા બસો રાજ્યના વિવિધ મુખ્ય શહેરો, પ્રવાસન સ્થળો અને ધાર્મિક સ્થાનોને સાંકળી લેશે. જેમાં ખાસ કરીને અમદાવાદ, ગોધરા, વડોદરા, પાલનપુર, નડીયાદ, સુરત, રાજકોટ, જુનાગઢ, પોરબંદર અને વલસાડ સહિતના રૂટ પર બસોનું ઘનિષ્ઠ સંચાલન કરવામાં આવશે. આ ઉપરાંત પાવાગઢ સહિતના અન્ય તીર્થધામોના રૂટ પર પણ મુસાફરોની માંગ મુજબ વધારાની બસો ફાળવવામાં આવશે, જેથી મુસાફરોને ક્યાંય અટકાવું ન પડે.
ગત વર્ષે 3.33 લાખ મુસાફરોએ લીધો હતો લાભ, એડવાન્સ બુકિંગ શરૂ
અત્રે ઉલ્લેખનીય છે કે, ગત વર્ષે પણ રક્ષાબંધનના પર્વ નિમિત્તે એસટી નિગમ દ્વારા 6402 જેટલી એક્સ્ટ્રા ટ્રીપોનું સફળતાપૂર્વક સંચાલન કરવામાં આવ્યું હતું. આ વિશેષ સેવાનો અંદાજે 3.33 લાખ મુસાફરોએ લાભ લીધો હતો. ચાલુ વર્ષે પણ બહેનો અને તેમના પરિવારજનો તહેવારમાં કોઈપણ પ્રકારની અગવડ વિના મુસાફરી કરી શકે તે માટે નિગમ દ્વારા એડવાન્સ બુકિંગની વ્યવસ્થા ઊભી કરવામાં આવી છે. નિગમ દ્વારા જાહેર જનતાને આ વિશેષ પરિવહન સેવાનો મહત્તમ લાભ લેવા અને છેલ્લી ઘડીની ભીડથી બચવા ટિકિટનું એડવાન્સ બુકિંગ કરાવી લેવા અપીલ કરવામાં આવી છે.
