કેન્દ્રીય ગ્રાહક બાબતો, ખાદ્ય અને જાહેર વિતરણ મંત્રી પ્રહલાદ જોશીએ રાજ્યસભામાં દેશના 81 કરોડ લાભાર્થીઓને મોટી રાહત આપતી સ્પષ્ટતા કરી છે. તેમણે જણાવ્યું છે કે સૂચિત રાષ્ટ્રીય ખાદ્ય સુરક્ષા (સુધારા) બિલ, 2026 ના અમલથી કોઈપણ રાજ્ય કે લાભાર્થીને મળતા ખાદ્યાન્નના ક્વોટામાં કોઈ જ ઘટાડો કરવામાં આવશે નહીં. પ્રશ્નકાળ દરમિયાન તેમણે સરકારની અનાજ વિતરણ નીતિ અંગેની સ્થિતિ સ્પષ્ટ કરી હતી.
રાજ્ય સરકારો પાસેથી ડ્રાફ્ટ બિલ અંગે મંગાવાયા સૂચનો
રાજ્યસભામાં પ્રશ્નકાળ દરમિયાન પૂરક પ્રશ્નોના જવાબો આપતા મંત્રી પ્રહલાદ જોશીએ જણાવ્યું હતું કે, રાષ્ટ્રીય ખાદ્ય સુરક્ષા (સુધારા) બિલ 2026 નો ડ્રાફ્ટ હાલ સરકારની વિચારણા હેઠળ છે. આ મુસદ્દા અંગે તમામ રાજ્ય સરકારો પાસેથી તેમની ટિપ્પણીઓ અને જરૂરી સૂચનો મંગાવવામાં આવ્યા છે. રાજ્યોના મંતવ્યો અને અભિપ્રાયો જાણ્યા બાદ જ આ બિલને અંતિમ સ્વરૂપ આપવામાં આવશે, જેથી પ્રક્રિયા સંપૂર્ણપણે પારદર્શક અને સર્વસમાવેશક બની રહે.
સમાન વિતરણ અને એકરૂપતા લાવવાનો મુખ્ય ઉદ્દેશ્ય
નવા સુધારા બિલના હેતુ વિશે ગૃહને વધુ માહિતી આપતા તેમણે જણાવ્યું હતું કે, આ ડ્રાફ્ટ બિલનો મુખ્ય ઉદ્દેશ્ય દેશભરમાં અનાજનું સમાન વિતરણ સુનિશ્ચિત કરવાનો છે. ઉપરાંત, નાગરિકોના હકમાં એકરૂપતાને પ્રોત્સાહન આપવા અને હાલની ઘરગથ્થુ વિતરણ પ્રણાલીમાંથી ઉદ્ભવતી ભિન્નતા કે વિસંગતતાઓને દૂર કરવા માટે આ બિલ લાવવામાં આવી રહ્યું છે. જેનાથી જાહેર વિતરણ સિસ્ટમ વધુ મજબૂત બનશે.
પ્રધાનમંત્રી ગરીબ કલ્યાણ યોજના: 81 કરોડ લોકોને દર મહિને 35 કિલો મફત અનાજ
મંત્રી જોશીએ ગૃહમાં આંકડાકીય માહિતી આપતા જણાવ્યું હતું કે, હાલમાં કેન્દ્ર સરકારની ‘પ્રધાનમંત્રી ગરીબ કલ્યાણ અન્ન યોજના’ હેઠળ દેશના 81 કરોડ જરૂરિયાતમંદ લોકોને વિનામૂલ્યે અનાજ પૂરું પાડવામાં આવી રહ્યું છે. તેમણે આ યોજનાને બિરદાવતા કહ્યું કે, તે વિશ્વની સૌથી મોટી ખાદ્ય સુરક્ષા યોજનાઓમાંની એક છે. આ કલ્યાણકારી યોજના અંતર્ગત દેશભરના પાત્રતા ધરાવતા પરિવારોને દર મહિને 35 કિલોગ્રામ મફત ખાદ્યાન્ન આપવામાં આવે છે.
