ગુજરાતના બે સાહસિક પર્વતારોહકોએ હિમાલયની ઊંચાઈઓમાં શાનદાર સિદ્ધિ હાંસલ કરીને રાજ્યનું ગૌરવ વધાર્યું છે. ડાંગના પર્વતારોહક ભોવાન રાઠોડ અને બનાસકાંઠાના પાલનપુરના પ્રકૃતિપ્રેમી કૈલાશ જાનીએ હિમાલયમાં 6 હજાર 111 મીટર એટલે કે અંદાજે 20 હજાર 49 ફૂટ ઊંચું માઉન્ટ યુનમ શિખર સફળતાપૂર્વક સર કરી શિખરની ટોચ પર તિરંગો લહેરાવ્યો છે.

માઉન્ટ યુનમ સર કરવાના આ સાહસિક અભિયાનમાં કુલ 10 પર્વતારોહકો જોડાયા હતા, જેમાંથી માત્ર ચાર જ પડકારજનક પરિસ્થિતિઓ વચ્ચે શિખરની ટોચ સુધી પહોંચવામાં સફળ રહ્યા હતા. ડાંગના ભોવાન રાઠોડે આ અભિયાન દરમિયાન માઉન્ટ યુનમની ટોચ પર તિરંગો લહેરાવી દેશપ્રેમ અને સાહસનું અનોખું ઉદાહરણ પૂરું પાડ્યું છે.

આ સાથે પાલનપુરના કૈલાશ જાનીએ પણ આ પડકારજનક પર્વતારોહણ સફળતાપૂર્વક પૂર્ણ કર્યું છે. વિશેષ બાબત એ છે કે કૈલાશ જાની એક જ કિડની ધરાવતા હોવા છતાં તેમણે પોતાની દૃઢ ઇચ્છાશક્તિ અને સાહસના બળે આ મુશ્કેલ શિખર સર કર્યું છે.

બંને પર્વતારોહકોની આ સિદ્ધિ ગુજરાતના યુવાનો માટે સાહસ, સંકલ્પ અને આત્મવિશ્વાસની પ્રેરણારૂપ બની છે.