દિલ્હી બાદ હવે દમણથી દેશના બે મહત્વના શહેરો અમદાવાદ અને મુંબઈ માટે પણ નવી હવાઈ સેવા શરૂ થવા જઈ રહી છે. આગામી 25 ઓગસ્ટથી એલાયન્સ એર દ્વારા આ ફ્લાઇટ સેવા શરૂ કરવામાં આવશે, જેનાથી દમણની કનેક્ટિવિટી વધશે અને મુસાફરોની મુસાફરી વધુ સરળ અને ઝડપી બનશે.

નમો એરપોર્ટ પરથી હવાઈ કનેક્ટિવિટીનો વિસ્તાર

કેન્દ્રશાસિત પ્રદેશના પ્રશાસક પ્રફુલ પટેલના નેતૃત્વમાં દમણની હવાઈ કનેક્ટિવિટીનો સતત વિસ્તાર કરવામાં આવી રહ્યો છે. વહીવટીતંત્રના જણાવ્યા અનુસાર, અગાઉ 16 જુલાઈના રોજ દમણના નમો એરપોર્ટ પરથી દિલ્હી માટે પ્રથમ કોમર્શિયલ ફ્લાઇટ શરૂ કરવામાં આવી હતી. આ સફળતા બાદ હવે 25 ઓગસ્ટથી એલાયન્સ એર દ્વારા દમણ, મુંબઈ અને અમદાવાદ વચ્ચે નવી હવાઈ સેવા શરૂ થવા જઈ રહી છે. આ ફ્લાઇટ સેવા મુસાફરો માટે દર અઠવાડિયે ત્રણ દિવસ એટલે કે મંગળવાર, ગુરુવાર અને શનિવારે કાર્યરત રહેશે.

મુંબઈથી દમણ થઈને અમદાવાદ જતી ફ્લાઇટનું સમયપત્રક

એલાયન્સ એર દ્વારા જાહેર કરાયેલા નિર્ધારિત સમયપત્રક મુજબ, આ ફ્લાઇટ સવારે 7:00 વાગ્યે મુંબઈથી ઉડાન ભરીને 7:45 વાગ્યે દમણ પહોંચશે. ત્યારબાદ, દમણથી સવારે 8:10 વાગ્યે અમદાવાદ માટે ઉડાન ભરશે અને 9:20 વાગ્યે અમદાવાદ પહોંચશે. વળતી મુસાફરીમાં, આ ફ્લાઇટ અમદાવાદથી બપોરે 12:35 વાગ્યે દમણ માટે રવાના થશે અને 1:45 વાગ્યે દમણ પહોંચશે. અંતમાં, દમણથી બપોરે 2:10 વાગ્યે મુંબઈ માટે ઉડાન ભરશે અને 2:50 વાગ્યે મુંબઈ પહોંચશે.

પ્રવાસન, વેપાર અને ઔદ્યોગિક ક્ષેત્રને મોટો ફાયદો થવાની અપેક્ષા

નવી હવાઈ સેવા શરૂ થતાં દમણની મુંબઈ અને અમદાવાદ સાથેની કનેક્ટિવિટી સીધી અને વધુ મજબૂત બનશે. હવાઈ સેવાના માધ્યમથી સમયની મોટી બચત થશે. ગુજરાત અને મહારાષ્ટ્રમાંથી દમણ આવતા પ્રવાસીઓની સંખ્યામાં વધારો થશે.