આગામી 11 ઓક્ટોબરથી શરૂ થઈ રહેલા નવરાત્રી મહોત્સવને લઈને અમદાવાદ શહેર પોલીસ અને વહીવટી તંત્ર સંપૂર્ણપણે સજ્જ થઈ ગયું છે. શહેરમાં યોજાનારા કોમર્શિયલ, ટ્રેડિશનલ, ઓપન પ્લોટ અને હોલના ગરબાના આયોજન અંગે પોલીસ, ફાયર અને મહાનગરપાલિકાની એક સંયુક્ત બેઠક યોજાઈ હતી. જેમાં મહિલા સુરક્ષા, ટ્રાફિક વ્યવસ્થા અને આધુનિક ટેક્નોલોજીના ઉપયોગ સાથેની કડક સુરક્ષા વ્યવસ્થા અંગે મહત્વના નિર્ણયો લેવામાં આવ્યા છે.
આયોજકો માટે કડક નિયમો અને NOC ની સરળ પ્રક્રિયા
નવરાત્રીના આયોજકોને સ્ટ્રક્ચરલ, R&B, ઇલેક્ટ્રિકલ, ફાયર અને ટ્રાફિક NOC મેળવવા માટે ખાસ ચેકલિસ્ટ આપવામાં આવ્યું છે. વહીવટી તંત્ર દ્વારા મંજૂરીની પ્રક્રિયા સરળ બનાવાઈ છે, જેથી સમયસર લાયસન્સ મળી શકે. દરેક ગરબા આયોજન માટે સ્થાનિક પોલીસ સ્ટેશનના અધિકારીઓને ‘મેન્ટર’ તરીકે જોડવામાં આવ્યા છે. આયોજકોએ એન્ટ્રી-એક્ઝિટ ગેટ, ઇમરજન્સી એક્ઝિટ, લાઈટિંગ અને જનરેટરની યોગ્ય વ્યવસ્થા ફરજિયાત કરવાની રહેશે. એક્ઝિટ પાસે વાહનો કે પેટ્રોલ-ડીઝલ જેવા જ્વલનશીલ પદાર્થો ન રાખવા માટે કડક સૂચના અપાઈ છે.
મહિલા સુરક્ષા અને સી-ટીમની સઘન દેખરેખ
ગરબામાં આવતી મહિલાઓની સુરક્ષાને વિશેષ પ્રાધાન્ય આપવામાં આવ્યું છે. તમામ ગરબા સ્થળોએ મહિલાઓ માટે અલગ એન્ટ્રી ગેટની વ્યવસ્થા ફરજિયાત કરાઈ છે. આ ઉપરાંત, મહિલાઓનું ફ્રિસ્કિંગ માત્ર મહિલા સિક્યુરિટી ગાર્ડ દ્વારા જ થાય તે સુનિશ્ચિત કરવા જણાવાયું છે. સુરક્ષા વ્યવસ્થા જાળવવા માટે પોલીસની સી-ટીમ દ્વારા ગરબા સ્થળો પર સતત દેખરેખ અને પેટ્રોલિંગ કરવામાં આવશે. પોલીસ દ્વારા ખેલૈયાઓને ગરબાની ગરિમા અને મર્યાદા જાળવી રાખવા પણ અપીલ કરવામાં આવી છે.
ટેક્નોલોજીનો ઉપયોગ: AI અને ફેસ રેકગ્નિશનની નજર
ગરબા મેદાનમાં ઓવરક્રાઉડિંગ (ભીડ) અટકાવવા માટે આ વખતે CCTV અને AI આધારિત કાઉન્ટિંગ સિસ્ટમ ફરજિયાત બનાવવામાં આવી છે. મેદાનની ક્ષમતા નજીક પહોંચતા જ AI સિસ્ટમ દ્વારા વોર્નિંગ મળશે અને તેનું સીધું ફીડ પોલીસ સ્ટેશનમાં પહોંચશે. અસામાજિક તત્વોને ઓળખી કાઢવા ફેસ રેકગ્નિશન ટેક્નોલોજીનો વ્યાપક ઉપયોગ થશે. ડુપ્લિકેટ ટિકિટ અને સિસ્ટમના દુરુપયોગ સામે પોલીસ બાજ નજર રાખશે.
ટ્રાફિક નિયંત્રણ અને અકસ્માત નિવારણ
પાર્કિંગ અને ટ્રાફિક વ્યવસ્થા માટે ટ્રાફિક પોલીસ આયોજકો સાથે સીધું સંકલન કરશે. રાત્રે ગરબા પૂર્ણ થયા બાદ રસ્તાઓ પર એકદમ વધતા ટ્રાફિકને નિયંત્રિત કરવા માટે વિશેષ ટ્રાફિક આયોજન ઘડવામાં આવ્યું છે. મોડી રાત્રે થતા ઓવરસ્પીડિંગ અને અકસ્માતો અટકાવવા માટે ટ્રાફિક પોલીસ વિશેષ ઝુંબેશ ચલાવશે અને નિયમોનો ભંગ કરનાર સામે કડક કાર્યવાહી હાથ ધરવામાં આવશે.
