◊ আজি আন্তৰাষ্ট্ৰীয় সংগ্ৰহালয় দিৱস। এই উপলক্ষে তেজপুৰ বিশ্ববিদ্যালয়ৰ সাংস্কৃতিক অধ্যয়ন বিভাগৰ উদ্যোগত যোৱা ১৩ মে’ৰ পৰা আয়োজন কৰা সপ্তাহযোৰা কাৰ্যসূচীৰ আজি সামৰণি পৰে। কাৰ্যসূচীৰ অংশ হিচাপে শোণিতপুৰ জিলা সংগ্ৰহালয়ৰ সহযোগত ছাত্ৰ-ছাত্ৰীসকলৰ বাবে তেজপুৰৰ ঐতিহ্যমণ্ডিত স্থানসমূহ পৰিদৰ্শনৰ ব্যৱস্থা কৰা হয়। তেজপুৰ চৰকাৰী উচ্চতৰ মাধ্যমিক বিদ্যালয় আৰু তেজপুৰ কলেজিয়েট উচ্চতৰ মাধ্যমিক বিদ্যালয়ৰ ৩০ গৰাকী ছাত্ৰ-ছাত্ৰীয়ে প্ৰতিনিধিত্বমূলকভাৱে অংশগ্ৰহণ কৰা এই কাৰ্যসূচীৰ জিলা আয়ুক্তই শুভাৰম্ভ কৰে। দলটোৱে শিঙৰি গুপ্তেশ্বৰ মন্দিৰত চলি থকা খননকাৰ্য পৰিদৰ্শন কৰাৰ লগতে দ- পৰ্বতীয়া শৈলতোৰণো পৰিদৰ্শন কৰে। উল্লেখযোগ্য যে আন্তৰাষ্ট্ৰীয় সংগ্ৰহালয় পৰিষদে ঘোষণা কৰা অনুযায়ী শিক্ষা আৰু গৱেষণাৰ বাবে সংগ্ৰহালয় চলিত বছৰৰ আন্তৰাষ্ট্ৰীয় সংগ্ৰহালয় দিৱসৰ বিষয়বস্তু।