■ সামাজিক মাধ্যম এক্সত প্রধানমন্ত্ৰী নৰেন্দ্ৰ মোদীৰ অনুগামীৰ সংখ্যাই ১০ কোটি অতিক্ৰম কৰিছে। যোৱা তিনিটা বছৰত প্ৰধানমন্ত্ৰীৰ অনুগামীৰ সংখ্যা প্রায় ৩ কোটি বৃদ্ধি পাইছে। ইয়াৰ ফলত শ্রীমোদী এক্সত বিশ্বৰ সৰ্বাধিক অনুসৰণ কৰা নেতা হিচাপে পৰিগণিত হৈছে। অনুগামীৰ সংখ্যাৰ দিশৰ পৰা প্ৰধানমন্ত্রী মোদী ৩ কোটি ৪১ লাখ অনুগামী থকা আমেৰিকাৰ ৰাষ্ট্ৰপতি জ’ বাইডেনকে ধৰি বিশ্বৰ আন নেতাসকলতকৈ বহু আগত আছে। অনুগামীৰ সংখ্যা ১০ কোটি পাৰ হোৱাৰ পাছত শ্ৰীমোদীয়ে সামাজিক মাধ্যম যোগে দিয়া এটা পোষ্টত এই মাধ্যমত থাকি নিজেই সুখী বুলি প্ৰকাশ কৰাৰ লগতে ইয়াৰ আলোচনা, বিতৰ্ক, জনসাধাৰণৰ আশীৰ্বাদ তথা গঠনমূলক সমালোচনাকে ধৰি বিভিন্ন দিশবোৰক তেওঁ উপভোগ কৰিছে বুলিও প্ৰকাশ কৰে। প্ৰধানমন্ত্ৰীগৰাকীয়ে ভৱিষ্যতেও এই মাধ্যমত সময় অতিবাহিত কৰিব বুলি প্ৰকাশ কৰে। গৃহমন্ত্ৰী অমিত শ্বাহে প্রধানমন্ত্রীক অভিনন্দন জনাই সামাজিক মাধ্যম যোগে দিয়া এটা পোষ্টত কয় যে, শ্রীমোদী সর্বাধিক অনুসৰণ কৰা বিশ্বনেতা হিচাপেও স্বীকৃতি পাইছে।