বিজেপিৰ জ্যেষ্ঠ নেতা আৰু প্ৰধানমন্ত্ৰী নৰেন্দ্ৰ মোদীৰ আজি স্বামী বিবেকানন্দ স্মাৰক শিলাত ৪৫ ঘণ্টীয়া ধ্যানৰ দ্বিতীয় দিন। শ্রীমোদী কালি কন্যাকুমাৰীত উপস্থিত হয় আৰু ধ্যানত বহাৰ পূৰ্বে ভাগৱতী আম্মা মন্দিৰত সেৱা জনায়। শ্ৰীমোদীয়ে গেৰুৱা বস্ত্ৰ পৰিধান কৰি ধ্যানত বহা পৰিলক্ষিত হৈছে। ১৮৯২ চনত স্বামী বিবেকান্দই ধ্যান কৰা শিলাত ৭৩ বছৰীয়া নেতাগৰাকীয়ে ধ্যান কৰিছে। শ্রীমোদীয়ে আজি পুৱাৰ ভাগত সূৰ্য্যক অৰ্ঘ্য দিয়া পৰম্পৰাও পালন কৰে। ভাৰতৰ দক্ষিণ প্ৰান্তৰ বংগোপসাগৰ, আৰৱ সাগৰ আৰু ভাৰত মহাসাগৰৰ সংগমস্থল কন্যাকুমাৰী হৈছে এটা উল্লেখযোগ্য স্থান। ৩৩ বছৰ পূৰ্বে শ্রীমোদীয়ে ১৯৯১ চনৰ ১১ ডিচেম্বৰৰ পৰা কন্যাকুমাৰীৰ পৰা কাশ্মীৰলৈকে একতা যাত্ৰাত অংশগ্ৰহণ কৰিছিল।