যশস্বী কবি হীৰেন ভট্টাচাৰ্যৰ স্মৃতি দিৱস উপলক্ষে ৰাজ্যবাসীয়ে শ্রদ্ধা নিবেদন কৰিছে। কেইবাখনো কবিতাপুথিৰে অসমীয়া ভাষা-সাহিত্যক চহকী কৰা কবি হীৰেণ ভট্টাচাৰ্যৰ সুগন্ধি পখিলা আৰু শইচৰ পথাৰ মানুহ দুখন উল্লেখযোগ্য কাব্য গ্রন্থ।
১৯৯২ চনত সাহিত্য একাডেমী বঁটাৰে সন্মানিত কবি গৰাকীয়ে ২০০০ চনত অসম উপত্যকা সাহিত্য বঁটা লাভ কৰিছিল। মুখ্যমন্ত্রী ড০ হিমন্ত বিশ্ব শৰ্মাই পূণ্য তিথি উপলক্ষে সুগন্ধি পখিলাৰ কবি, শব্দৰ খনিকৰ হীৰেন ভট্টাচাৰ্যক শ্ৰদ্ধাৰে সুঁৱৰিছে মুখ্যমন্ত্ৰীগৰাকীয়ে সামাজিক মাধ্যমযোগে দিয়া এটা বাৰ্তাত কয়, যে সাহিত্যিকগৰাকীৰ সৰল অথচ গভীৰ অনুভূতিৰে ভৰা কবিতাই অসমীয়া সাহিত্যলৈ নতুন সুৰ, নতুন ভাষা আৰু নতুন সংবেদনশীলতা কঢ়িয়াই আনিছিল।
ড০ শৰ্মাই কয়, যে শব্দক হৃদয়ৰ স্পন্দনলৈ ৰূপান্তৰ কৰাৰ অপূৰ্ব ক্ষমতাৰে তেওঁ অসমীয়া আধুনিক কবিতাত অনন্য যুগৰ সূচনা কৰিছিল। কবিগৰাকীৰ শব্দ, চিন্তা আৰু সৃষ্টিৰ মাধুৰ্য্যই প্ৰতিটো প্ৰজন্মক অনুপ্রাণিত কৰি থাকিব বুলি মুখ্যমন্ত্ৰীয়ে মন্তব্য কৰে।
